Take vir November
106
Plante vir die somer
As jy oop spasies het in jou tuin, veral in ’n bestaande randakker, kan jaarplante dit help vul. Hulle helder ingange, stoepe, houers en hangmandjies kleurvol op. Kies jaarplante soos ageratums, Celosia, Dianthus, Gazania, afrikaners, petunias, salie, ysterkruid, Vinca en jakobregops in helder skakerings of pastelkleure.
Die lae, spreidende groeiwyse van sonliewende Alyssum, Nierembergia, ysterkruid en portulakke is ideaal vir randakkers, skuinstes en tussen plaveiblokke.
Plant die spinnekopblom (Cleome) met sy wit-en-pienk blomme en lang saadpeule, Lavatera met sy kelkvormige pienk en wit blomme, en rooi, pienk, pers en geel trompetblomme agter in ’n bedding.
Impatiens is ’n gewilde somerbeddingplant vir ’n kleurinspuiting onder bome. Twee ander jaarplante wat goed aard in gefiltreerde of ligte skaduwee, is Coleus met sy kleurryke loof en Torenia.
Tuine vir kinders
Nasionale Kinderdag op 5 November mik om die welsyn van kinders te bevorder. Maak tuinmaak vir die kleinspan ’n vreugdevolle ervaring waardeur hulle kan speel en hul verbeelding vrye teuels gee, oefening kry en ’n band met die natuur kan smee.
Moedig ’n gesonde leefstyl aan deur te verseker jou tuin het bome om in te klim, vrugtebome, “feetjiedeure” in helder kleure teen boomstompe geverf, trapklippe vir eenbeentjie speel en klein bome vir teddiebeer-pieknieks in die bos.
Nog ’n goeie idee is om ’n deel van die tuin af te baken waar jou kinders en kleinkinders self kan tuinmaak. Moedig hulle aan om jaarplante wat vinnig groei, soos kappertjies, sonneblomme en gousblomme, te plant. Hulle sal ook daarvan hou om eetbare plante soos boontjies, radyse en blaarslaai te plant, en hul eie oes te geniet.