Hoender gevul met pynappelrys

Rial en Daniel sit gewoonlik die pynappelrys as bykos* voor; ons het dit as vulsel vir hoender gebruik. • 2 vet hoenders, maagholte ontbeen • suurlemoensap en -skil na smaak PYNAPPELRYS • 500ml basmatirys, afgespoel • 500ml kookwater • 125ml sap uit ’n gedreineerde blik fyn pynappel (hou 250ml pynappel eenkant) • 10ml sout • 125ml bruinsuiker • 45ml botter • 10ml gerasperde suurlemoenskil en ’n bietjie suurlemoensap • ’n ruim knippie neutmuskaat

1 Maak die rys Sit die rys, kookwater, pynappelsap en sout saam in ’n kastrol en bring tot kookpunt. Verlaag die hitte en laat stoom met die deksel op vir sowat 20 minute tot al die vloeistof geabsorbeer is. 2 Roer die res van die bestanddele deur met ’n vurk en laat die rys so vinnig moontlik afkoel deur dit in ’n breë, plat bak uit te keer. 3 Vir die hoender Voorverhit die oond tot 180 °C. Geur die hoenders met sout, peper en suurlemoen. Vul dan die maagholtes met die pynappelrys. Sit die hoenders in ’n oondbak, bedek en rooster vir sowat 1 uur. Skep enige orige rys by die hoender in die oondbak en rooster vir nog 20 minute tot die hoender goudbruin en die rys geurig is.

* Pynappelrys as bykos 1 Maak die rys gaar soos in stap 1 hierbo. 2 Voorverhit die oond tot 180 °C. Roer die res van die rysbestanddele deur met ’n vurk. 3 Keer die rysmengsel uit in ’n gesmeerde oondvaste glasbak en bak vir 15–20 minute tot deurwarm en geurig.