’n Wenspan

Layla Basson van Johannesburg skryf Watter hondesoort is die geskikste vir jong kinders?

Dr. Quixi Sonntag, ’n dieregedragskenner en lid van die Suid-Afrikaanse Veterinêre Vereniging, en dr. Magdie van Heerden, ’n veterinêre maatskaplike werker, gee die volgende wenke: • Groot, uitbundige honde soos labradors of ander retrievers kan maklik ’n klein kind omstamp, en al is hulle baie liefdevol, kan hulle skade in ’n huishouding veroorsaak as hulle te entoesiasties is en nie geleer is om selfbeheersing toe te pas nie. • ’n Klein hond is ook nie noodwendig beter nie: van die kleiner terriërs kan byvoorbeeld te lewendig wees en selfs bitsig teenoor klein kinders optree. • Die heel klein honderasse soos miniatuurpinschers, en klein diere soos hasies, is dikwels ook ’n slegte keuse vir baie jong kinders omdat die diere ernstig beseer kan word as iemand hulle laat val. Onthou, die troeteldier se welsyn is net so belangrik soos die kind s’n. • In party gevalle kan ouers besluit op ’n konsultasie met ’n gekwalifiseerde dieregedragskenner voor hulle ’n troeteldier kry. Dié spesialiste kyk na alles wat ’n troeteldier se integrasie in ’n huishouding kan beïnvloed. Die soort blyplek, leefstyl en struktuur van die huisgesin, soort hond, beskikbare tyd en jou finansiële hulpbronne kan bepaal hoe goed die hond inskakel. Dié soort assessering sal help dat jy ’n troeteldier kry wat inpas by jou gesin se behoeftes; in party gevalle sal ’n klant selfs besef dis die verkeerde tyd om ’n troeteldier te kry. Hou die volgende in gedagte wanneer jy ’n troeteldier vir jou kind oorweeg:

1 Dink mooi na hoekom jy ’n troeteldier wil hê. Moet dit byvoorbeeld nie doen as jou kind spesiale behoeftes het nie, want ’n hond kan enige probleme vererger; dit kan ook moeilik vir die hond wees.

2 Maak seker jy het die fisieke, emosionele en finansiële hulpbronne vir ’n troeteldier.

3 Jy het nie ’n troeteldier vir elke kind in jou huishouding nodig nie – beskou ’n troeteldier as ’n nuwe lid van die gesin.

4 Alle gesinslede moet leer hoe om honde en katte se lyftaal te lees sodat hulle weet wanneer om ’n troeteldier uit te los omdat dit geïrriteerd of bang is.

5 Maak seker jy los nooit jou kinders en troeteldier alleen saam nie.

KONTAK sava.co.za