Jogurtkaas

Meng sowat 3ml sout deur 1 liter Griekse jogurt (dit moet dubbeldik wees, anders gaan jou kaas baie lank hang). As jy wil, kan jy allerlei geurmiddels byvoeg; speserymengsels soos dukkah, vars kruie, gerasperde suurlemoenskil en brandrissievlokkies is heerlik, maar onthou: Minder is meer en die geure gaan verskerp terwyl die kaas vorm.

Spoel ’n vierkantige moeseliendoek in kookwater, druk die oortollige vog uit en laat afkoel. Skep nou die jogurt in die middel van die doek en bind toe met ’n stukkie tou. Laat hang die jogurtbal vir 2–3 dae op ’n koel, droë plek in jou kombuis waar dit geen direkte sonlig kry nie (in die yskas as dit warm is). Plaas ’n mengbak onder die kaasbal waarin die wei kan drup.

Sit die kaas net so voor met ’n sprinkel olyfolie en growwe sout, of rol dit in klein balletjies en marineer dit in ’n bietjie olyfolie. Dis heerlik saam met vars bruschetta. Genoeg vir 4 Bereidingstyd: 35 minute Gaarmaaktyd: 20 minute

• 4 groot hoenderborsfilette • 200ml roomkaas • 60ml sagte botter • 15ml gekapte platblaarpietersielie • 5ml gekapte kappertjiesaad • 5ml gerasperde suurlemoenskil • sout en varsgemaalde swartpeper • 200g vars broodkrummels • 50g parmesaankaas, gerasper • 125ml koekmeel • 2 eiers, geklits • olie vir vlakbraai • babaspinasie, geroosterde kersietamaties en olywe

1 Sit die hoenderborsfilette tussen twee lae botterpapier of kleefplastiek. Gebruik ’n rolstok en rol dit effens platter of kap dit liggies totdat die vleis sowat 5 mm dik is en maklik opgerol of toegevou kan word. 2 Meng die roomkaas, botter, pietersielie, kappertjiesaad en suurlemoenskil. Geur met sout en swartpeper na smaak. 3 Verdeel die vulsel tussen die hoenderstukke en rol elkeen versigtig op sodat die roomkaasvulsel mooi in die middel van elke filet toegedraai is. Dit help om ’n stuk kleefplastiek te gebruik en die hoenderrolletjies styf daarin toe te rol. Sit hulle dan vir sowat 15 minute in die yskas. 4 Meng die krummels en parmesaankaas. Rol nou elke hoenderpakkie in die meel, dan in die geklitste eier en laastens in die broodkrummels. Vlakbraai die hoender in olyfolie tot goudbruin alkante. Rooster dit dan in ’n voorverhitte oond teen 180 °C vir sowat 10 minute, net om seker te maak die hoender is deurgaar. Om voor te sit, sny elke hoenderrolletjie in drie ewe groot stukke en rangskik dit op ’n bed babaspinasie met geroosterde kersietamaties en olywe tussenin. Koeskoes of kapokaartappels is heerlike bykos hierby.