Vegetariese lasagne
’n Mediterreense gunsteling wat beslis die ekstra bereidingstyd werd is. Genoeg vir 6–8 porsies Bereidingstyd: 1 uur Gaarmaaktyd: 2 uur
• 2 mediumgroot eiervrugte, in repe gesny • olyfolie • 1kg botterskorsie, geskil en in dun skyfies gesny • 5ml droë brandrissievlokkies • 5ml droë gemengde kruie • 800g aartappels, in dun skyfies gesny en gekook tot net sag • 60ml elk broodkrummels en parmesaankaas TAMATIESOUS • 1 ui, gekap • 30ml olyfolie • 1 blik tamatiepuree • 2 lourierblare • ’n takkie roosmaryn • 60ml gekapte pikantrissies WITSOUS • 80ml botter • 80ml meel • 5ml mosterdpoeier • 800ml warm melk • neutmuskaat • 150g cheddarkaas, gerasper
1 Maak die tamatiesous Braai die ui in die olie tot glansend. Voeg die res van die bestanddele, asook 250 ml water, by en laat prut vir sowat 20 minute tot dik en geurig. Geur met sout en swartpeper na smaak. 2 Vir die witsous, smelt die botter in ’n klein kastrol oor matige hitte en klits die meel en mosterd by. Klits tot glad en braai vir ’n minuut tot skuimerig. Verwyder van die hitte en klits die melk geleidelik by – dit keer dat daar klonte vorm. Sit weer terug op die hitte om te verdik terwyl jy af en toe roer. Verwyder van die hitte en geur met sout en peper na smaak, asook ’n knippie neutmuskaat. Roer die kaas by. 3 Sprei die eiervrugskyfies op ’n bakplaat uit, sprinkel ’n bietjie olyfolie oor en rooster onder ’n voorverhitte roosterelement (of in ’n riffelpan) tot gaar. 4 Geur die botterskorsie met olyfolie, sout en swartpeper, die droë brandrissie en ’n knippie droë kruie. Rooster ook onder ’n voorverhitte roosterelement tot gaar en sag. Draai die skyfies om wanneer nodig. 5 Stel dit saam Skep ’n lepel tamatiesous onder in ’n diep oondbak en pak ’n lagie aartappels, botterskorsie en eiervrug bo-op. Skep nou ’n ruim laag witsous oor. Herhaal die lae tot al die bestanddele opgebruik is en eindig met ’n skep witsous. Sprinkel die broodkrummels en parmesaan oor en bak in ’n voorverhitte oond teen 180 °C tot goudbruin en deurgaar (sowat 1 uur).