Die opknap
52
Tydens die opknapprojek het Marius sy woonstel as een vertrek benader. Al wat hy van die oorspronklike ruimte wou behou, was die blokkiesvloer in die sitkamer, gang en slaapkamer. “Dit was nogal ’n uitdaging om so te werk – een soort beligting in al die vertrekke, net wit mure, ’n moderne kombuis en badkamer, en ’n swart-en-wit tema regdeur,” vertel hy.
Die eerste stap was om mure uit te breek om van die benoude vertrekke ontslae te raak. “Ek het die lang L-vormige muur tussen die sitkamer, gang en kombuis uitgebreek, asook ’n deel van die muur tussen die kombuis en balkon. Dit het onmiddellik die hele woonstel ligter gemaak,” verduidelik hy.
Die balkon was met ’n skuifdeur in twee verdeel, en het ’n rooi sementvloer aan die een kant en ’n wit teëlvloer aan die ander kant gehad. “Die ruimte was heeltemal onderbenut en afgesny van die res van die woonstel,” sê Marius. Die ou vloere is uitgekap en herwinde houtblokkies is gelê sodat die leefvertrek en balkon se vloer aaneenvloei. Nou word een helfte van die balkon as eetkamer gebruik, en die ander helfte as tuiskantoor.
Die ou badkamer en kombuis is heeltemal uitgeruk en herontwerp. “Ek het drie gerespekteerde kombuismaatskappye laat kwoteer en een het sommer die hasepad gekies omdat dit volgens hulle onmoontlik sou wees om ’n wasmasjien, skottelgoedwasser, stoof en yskas in die beperkte ruimte in te pas.
“En dan is daar mos maar altyd verrassings. Die nuwe kombuisplanne was net mooi klaar toe ons besef die kragboks kan nie skuif nie. Nou is dit teen ’n stuk muur wat ek eintlik heeltemal wou uitbreek. Gelukkig het alles perfek uitgewerk en lyk dit of dit so hoort.”
NUWE BADKAMER