Dekordilemma Die probleem
Die braaikamer is sowat 30m² groot en toegebou met glas. 80 4 Herstoffeer en voeg tekstuur by 5 Met liefde
Sania Hagen-Houndsome van die Paarl skryf Ons braaikamer is die gesin se gunsteling-kuierplek. Dit het al goeie tye, heerlike kuiers, hartseer en trane gesien. Gewapen met my het ek reeds heelparty takies in die huis aangepak, maar die braaikamer was altyd my man se gebied. Hy is drie en ’n half jaar gelede met kanker gediagnoseer en is ná ’n kort siekbed oorlede. Ons was in die braaikamer toe ons die oproep met sy diagnose kry; ons het saam daar gehuil, en hy het amper tot die einde daar op die bank gelê. Ek gaan sit nou nog daar wanneer ek alleen ’n traan wil stort. Al is ek nou op my eie, braai ek nog elke naweek.
Lang storie kort: Ek dink ek is gereed om “my” stempel op “ons” braaikamer af te druk. Het julle dalk ’n paar idees? Kan ek byvoorbeeld die rietplafon wit verf? Ek is nie een vir die kontemporêre styl nie en verkies iets tussen ’n plaas- en strandhuis. Ek hou van eenvoud en natuurlike kleure. Ek is ook lief vir die buitelewe, so dit sou wonderlik wees as daar vloei tussen die braaikamer en die tuin is. Wat stel julle voor?
Dis belangrik om te keer dat ’n braaikamer ontaard in ’n stortterrein vir die goed wat jy nie meer nodig het nie. Verwyder alles wat die ontspanne gevoel bederf; oorweeg dit om ’n kas te laat inbou waarin jy los artikels agter toe deure kan wegsteek. Hier is nog bekostigbare voorstelle om ’n knus toevlug te skep waarin jy nuwe herinneringe kan bou:
’n Laag verf bly maar die maklikste en bekostigbaarste manier om ’n plek nuwe lewe te gee. Ek stel voor jy kies ’n kleurpalet wat jou liefde vir die buitelug weerspieël. Grys, blou en ’n ligte saliegroen sal ’n kalm kleurskema skep wat jy dan kan opkikker met kontrasterende aksente soos geel strooikussings, of selfs ’n bos geel blomme uit jou tuin.
Verf die ontblote bakstene ’n ligte duifgrys en die kaste wit of naaswit om warmte aan die ruimte te gee. Dié wit kan jy dan herhaal op die rietplafon (sien kassie regs vir aanwysings). Los die houtbalke natuurlik of verf dit ook grys soos die mure.
Maak tuin net buite die skuifdeur sodat jy ’n uitsig op geil lower en jou en jou oorlede man se gunstelingblomme kan hê. Oorweeg ook huisplante binne-in die braaikamer om die voorkoms van die plafon en bakstene te versag; plante wat sal floreer in so ’n omgewing sluit die mot-orgidee, vredes-lelie en geelbamboes-palm in. Voeg ’n paar hangmandjies of meer kontemporêre planthouers by en druk jou vroulike stempel af met vars blomme af en toe op die koffietafel.
Vrolik jou vierkantige eettafel op met ’n laptafeldoek en oorweeg kafeestyl-stoele daarby – dis in allerlei kleure te kry. Installeer ook ’n hanglamp direk oor die tafel.
Gee die ou rusbank ’n nuwe voorkoms: Laat stoffeer dit met treffende gestreepte lap, of laat ’n los oortreksel en strooikussings op maat daarvoor maak. Vul dit aan met ’n paar vloerkussings of ottomans vir informele sitplek.
Hou ’n mandjie byderhand met snoesige dekens vir wanneer jy op die bank wil opkrul met ’n boek. Mandjies verskaf tekstuur en kan ook gebruik word om dennebolle en brandhout in te bêre. Soortgelyke mandjies onder die koffietafel kan praktiese bêreplek bied vir boeke en tydskrifte.
Jy kan die vensters afrond met moderne blindings, met deursigtige gordyne bo-oor vir ’n tikkie vroulikheid – maar onthou dat jy dié gereeld sal moet was om die rookreuk uit te kry!
Anker die sit-area met ’n mat van sowat 160 x 230 cm – growwe natuurlike vesels soos goiing sal die mandjies onder die vuurherd komplementeer.
Ter nagedagtenis aan jou man kan jy ’n skinkbord met pragtige geur-kerse op die koffietafel neersit sodat vriende en familie een kan aansteek wanneer hulle so voel. Kombineer dit met vars blomme of van sy hartsgoed.
Daar is reeds foto’s bo die braai, maar ek stel voor jy gebruik rame van natuurlike of verweerde hout om gesinsfoto’s of jou man se oulikste sêgoed uit te stal. Groepeer die foto’s saam en gebruik die negatiewe ruimte (die ruimte tussen die rame) om die perfekte balans te skep.
Verf ’n rietplafon
Don McWilliam van WeatherPrufe Paints (021 556 4200, weatherprufe.co.za) het die volgende raad: Omdat ’n rietplafon ’n ongelyk oppervlak is, sal dit moeilik en arbeidsintensief wees om dit te verf. Gesels dalk eers met ’n kontrakteur wat waterbasisverwe aanspuit, of oorweeg ’n produk soos Rust-Oleum se High Heat Ultra Spray Paint. Anders kan jy ’n groot, growwe kwas gebruik om die verf tussen die riete in te werk.