’n Huis uit die 70’s kry die perfekte retro-kontemporêre baadjie
Dié ywerige opknappers het ’n ouderwetse huis omskep in ’n asemrowende retrokontemporêre ruimte.
Met hul eie hande
Die opknapgogga het Ian en Martina in 2014 gebyt toe hulle saam met ’n vriend ’n naweekwegbreekplek op Koringberg in die Swartland gekoop het. ’n Buitegebou by dié huis moes in ’n kombuis omskep word en omdat hul begroting knap was, het die paartjie besluit om die meeste van die werk self te doen.
Hulle het die proses só geniet dat hulle besluit het om hul eie opknap-onderneming, Spirited Level, op die been te bring, en het binne net ’n paar jaar ’n goeie portefeulje saamgestel. “Ons noem onsself steeds ‘groentjies’, al het ons die afgelope twee jaar taamlik interessante goed ontwerp, gemaak en gebou,” sê Ian.
Met die opknap van hul Boston-huis, wat sowat drie maande geduur het, het hulle strukturele veranderings aangebring deur onder meer ’n ingeboude kas tussen die kombuis en eetkamer uit te haal, en ’n muur tussen die stort en badkamer uit te breek ter wille van ’n groter badkamer.
Tydens die projek moes die paartjie van vertrek tot vertrek trek namate hulle gevorder het. “Ons het al ons besittings in die garage gebêre en heel eerste die vloere gedoen. Dit was winter en ons het net twee stoele voor die kaggel gehad, waar ons elke aand ’n tjoppie gebraai het,” vertel Martina.
Saam-saam het hulle die ou kiaat- en fineer-kombuiskaste uitgehaal, al die matte en teëls regdeur die huis verwyder, die blokkiesvloere gerestoureer, sementvloere afgevlak en die binnemure geverf. Af en toe het familie kom hand bysit, terwyl die loodgiet- en messelwerk deur kenners behartig is.
Volgende op hul lys is die uitgestrekte tuin ...