Dagboek Junie-hoogtepunte
OP DIE KASSIE
Die argitek George Clarke is terug vir ’n splinternuwe seisoen van Restoration Man (seisoen 4 begin op 5 Junie op The Home Channel, kanaal 176 op DStv). Hy reis die Verenigde Koninkryk plat om verwaarloosde geskiedkundige geboue te omskep in pragtige, besonderse wonings. Moet dit nie misloop nie!
Port Elizabeth Homemakers Expo 2017
22–25 Junie: Die Boardwalkuitstalsentrum Kry al die inspirasie, raad en produkte wat jy kort om jou huis na jou smaak te versier. Tussendeur kan besoekers smul aan watertandgeregte, plaaslike wyn en spesialisbier. Kaartjies kos R40 vir volwassenes, R20 vir pensioentrekkers; kinders onder 12 kan gratis ingaan. Besoek homemakersonline.co.za.
Good Food & Wine Show
2–4 Junie: KIKS, Kaapstad Bly op hoogte met al die jongste neigings en skuur skouers met glansmense in die kosbedryf, soos Suid-Afrika se eerste Michelin-sjef, Jan Hendrik van der Westhuizen. Daar sal natuurlik ook ’n oorvloed kosstalletjies en wynproeë wees om die sintuie te prikkel. Sien meer by goodfoodandwineshow.co.za. Die GF&WS is in Julie in Johannesburg!
Pottebakkersmark en keramiekuitstallings
3 Junie: Rust-en-Vrede-galery, Durbanville Die kunstenaar Hennie Meyer begelei ’n wandeling deur die keramiekmark terwyl sy werk ook in die galery te sien sal wees. Ander attraksies is uitstallings deur onder andere Marieke Prinsloo en Strijdom van der Merwe, en klei-demonstrasies. Toegang is gratis. Sien rust-en-vrede.com.