[OORWEEG JY ’N SMEULKAGGEL?]
Hou dié 10 punte in gedagte voor jy ’n besluit neem:
1 Smeulkaggels kom in verskillende groottes en jy moet vooraf weet hoe groot die vertrek of vertrekke is wat jy wil verhit. Werk dit so uit: vermenigvuldig die breedte van die vertrek met sy lengte en hoogte. Dit gee jou die volume in kubieke meter. Die verkoopsagent sal dan kan raad gee oor watter kaggelgrootte (aangedui in kilowatt) jou vertrek doeltreffend sal verhit. 2 Die kaggels word van gietyster of staal gemaak. Gietysterkaggels het meestal ’n langer waarborg, maar dit wissel van verskaffer tot verskaffer; maak seker voor jy koop. Duurder modelle is soms beskikbaar met ’n opsionele emaljebedekking. Dit lyk mooi, maar kapplekke is moeilik om te herstel. 3 Gietysterkaggels raak baie warm. Hou daarom in gedagte hoe naby jou meubels aan die kaggel gaan staan. ’n Lekker groot kaggel gaan dalk die vertrek goed warm maak, maar dan is daar dalk nie genoeg plek vir jou rusbank oor nie! 4 Smeulkaggels uit China is dikwels goedkoper as dié wat in Europa gemaak is. As jy ’n Chinese kaggel oorweeg, maak seker dit voldoen aan die Europese Unie se standaarde (dis dalk nie ’n goeie idee om ’n Chinese namaaksel van ’n Europese ontwerp te koop nie!). 5 Installeringskoste kan net soveel soos die kaggel self kos; hou dit maar in gedagte wanneer jy begin somme maak. Hoe hoër jou plafon (of dak by ’n dubbelverdiepinghuis), hoe meer skoorsteenpyp het jy nodig – en dis ’n duur item! 6 Die meeste skoorsteenpype is van vlekvrye staal, wat mettertyd ’n koperkleur kry vanweë die hitte. As jy nie daarvan hou nie, kan jy die pyp swart laat kleur. 7 Op houtvloere moet jy ’n hittebestande paneel onder jou kaggel hê vir veiligheid. Dit kan van getemperde glas, graniet of staal wees. Laasgenoemde is die goedkoopste. 8 Sekere kaggels het ’n konveksie-funksie – dis meestal duurder, maar maak ’n ruimte egaliger warm. Gewone gietysterkaggels verhit weer deur middel van uitstralingshitte; hoe nader aan die kaggel, hoe warmer sal dit wees. 9 Maak seker jou kaggel het ’n los aspan (dit maak makliker skoon) en ’n deurknop wat nie te warm word nie. Party het verwyderbare knoppe as veiligheidsmeganisme sodat kinders nie per ongeluk die deur oopmaak terwyl die vuur brand nie. 10 En onthou – met ’n klein kaggel kan jy sukkel om jou houtstompies in te pas, wat beteken jy moet dit eers deursaag. Dink maar wat die gemiddelde lengte van ’n houtstomp is en maak seker jou kaggel se deur is breed genoeg! Want wie’t nou lus vir hout saag buite in die koue?