Osteoartritis in troeteldiere

John Myburgh van Johannesburg skryf My ouer labrador-kruising is dol oor stappies en hadidas jaag, maar hy beweeg deesdae stadiger. Dit lyk of hy pyn in sy regteragterbeen het. Wat kan die probleem wees?

Dr. Guy Fyvie, veeartsenykundige adviseur by Hill’s Pet

Nutrition SA, antwoord Dit is klassieke tekens van osteoartritis, die algemeenste oorsaak van chroniese pyn by honde. Osteoartritis is skade en inflammasie in ’n gewrig en die omringende weefsel; dit veroorsaak pyn, soms swelling en minder beweeglikheid. Gewrigte “verslyt” gewoonlik weens ouderdom, en die situasie word vererger deur ekstra gewig of iets soos heup- of elmboog-displasie, wat vir jare onontdek kan wees.

Kyk ook uit vir dié tekens: Jou hond staan moeilik op (veral in koue weer) en sukkel met trappe en ongelyk oppervlakke. Hy kan ook bitsig wees omdat hy pynlike kontak wil vermy – wees veral versigtig as daar kleiner honde en jong kinders is!

Laat ’n veearts jou hond volledig ondersoek. Hy sal dalk ’n operasie nodig hê, of die veearts kan besluit om op pynbeheer en groter beweeglikheid te fokus. ’n Spesiale dieet en anti-inflammatoriese medikasie vir honde, wat goeie pynverligting bied, kan ’n merkbare verskil maak. Agt uit 10 eienaars sê hul troeteldier loop, speel en staan makliker op sedert hulle Hill’s Prescription Diet j/d-kos kry. Dis die enigste kos wat klinies bewys is dat dit beweeglikheid binne net 21 dae verbeter.

Enige ekstra gewig sit spanning op die gewrigte, so dis belangrik dat jou hond nie oorgewig is nie. Hill’s Prescription Diet Metabolic + Mobility kombineer die voordele van gewigsverlies en gesonde gewrigte.

Fisio- en/of hidroterapie kan voordelig wees; vra jou veearts om jou na ’n rehabilitasiesentrum te verwys. Jy kan jou hond self saggies masseer en ’n warmwatersak (nie te warm nie) gebruik. Daaglikse matige, laeimpak-oefening is belangrik – stap of swem gereeld met jou hond. Hy moet net nie spring nie, en moet nooit só oefen dat hy pyn ervaar nie.

Klein veranderinge aan sy omgewing sal ook help: Sorg dat sy kos en water binne maklike bereik is, dat hy ’n sagte, warm bed weg van koue trekke het, dat hy so min moontlik trappe klim en dat jou matte ’n glyvaste basis het.

Al kan osteoartritis ’n pynlike siekte wees, kan jou troeteldier ’n gelukkige lewe lei indien jy die siekte goed bestuur.

KONTAK hillspet.co.za