Harissa-lamstjops
Harissasmeer is ’n geurige kombinasie van rooi soetrissies en brandrissies, fyngemaak met speserye, knoffel en olie; dit kom oorspronklik uit Tunisië. Die pasta, soos pesto, gee ’n geurinspuiting aan menige dis, van slaaie tot roostergeregte. As jy wil kortpad kies met die resep, beveel ek aan jy koop sommer ’n potjie klaargemaakte harissapasta. Genoeg vir 4 • Bereidingstyd: 40 minute Gaarmaaktyd: 45 minute
• 8 lamsribtjops • 15 ml olie • gaar basmatirys vir voorsit • 100 ml gevlokte amandels, gerooster • 3 dadels, gekap • vars koljander HARISSA • 2 rooi soetrissies (sowat 200 g) • 3 sagte songedroogde tamaties • 1 rooi brandrissie, ontpit • 1 knoffelhuisie • 4 ml sout (of na smaak) • 3 ml elk koljander en komyn • 1 gedroogde brandrissie (of na smaak) • ’n knippie suiker • 15 ml vars suurlemoensap • 5 ml gerookte paprika • sowat 45 ml olyfolie
1 Maak die harissa Rooster die soetrissies oor ’n oop vlam (of onder die roosterelement van jou oond) tot die skil swart gebrand is en laat dit in ’n toegevoude plastieksakkie “sweet” tot dit koel genoeg is om te hanteer. Trek dan die skilletjies af en sit die vlees in ’n voedselverwerker saam met die res van die harissa-bestanddele, buiten die olie. Voeg die olie geleidelik by en pols tot ’n growwe pasta.
2 Vryf nou sowat 60 ml van die pasta oor die tjops en marineer vir sowat 30 minute by kamertemperatuur.
3 Verhit die olie in ’n dikboompan en braai die tjops tot lekker bruin alkante. Voeg die res van die harissa by (plus ’n skeutjie water as dit lyk na brand) en laat prut tot die vleis so gaar is soos jy daarvan hou. Sit die vleis en sous voor met basmatirys wat met amandels, dadels en koljander besprinkel is.