Lam-en-niertjiepastei

Genoeg vir 4 individuele pasteie Bereidingstyd: 1 uur • Gaarmaaktyd: 4 uur Oondtemperatuur: 160 °C en 180 °C

• 300 g gerookte varkrepe, in blokkies gesny • sowat 30 ml olyfolie • 1 kg lamsrugstring- en -skenkelskywe (meer vleis as been) • sowat 300 g lamsbene (opsioneel) • 30 ml meel • 15 ml mosterdpoeier • ’n knippie rooipeper • 1 groot prei se wit gedeelte, gekap • 15 ml tamatiepuree • 330 ml sider • 250 ml vleisaftreksel • 2 takkies origanum • 2 lourierblare • 300 g lamsniertjies, skoongemaak en in blokkies gesny DEEG • 420 g (750 ml) bruismeel • 5 ml sout • 5 ml suiker • ’n knippie droë tiemie • 150 g botter, kamertemperatuur • 250 ml karringmelk

1 Voorverhit die oond. Braai die vark in 15 ml olie tot goudbruin oraloor. Skep uit in ’n oondvaste bak, maar behou die vet in die pan. Rol die rugstring- en skenkelskywe in die meel, mosterd en rooipeper en braai dit saam met die lamsbene in sarsies tot goed bruin. Skep by die vark in die oondbak. Voeg die prei en tamatiepuree by die pan en roer deur. Voeg die sider by. Kook vir ’n minuut en skraap enige stukkies op die bodem los. Giet die pan se inhoud en die aftreksel oor die vleis in die oondbak, voeg die origanum en lourierblare by, bedek en sit in die oond vir 3 uur.

2 Ontbeen die saggeroosterde vleis en skep dit terug in die sous. Braai die niertjies in die orige olyfolie tot bruin en meng by die pasteivulsel. Geur na smaak met sout en peper en skep in die pasteibakkies.

3 Maak die deeg Sif die bruismeel, sout en suiker saam, voeg die tiemie by en vryf die botter in tot die mengsel soos growwe broodkrummels lyk. Gooi nou die karringmelk by en sny dit in met ’n bottermes (soos vir skons) tot die mengsel bymekaarkom. Keer uit en knie die deeg vlugtig; dit hoef nie heeltemal glad te wees nie. Druk dit dan op ’n meelbestrooide oppervlak platter tot sowat 7,5 mm dik en sny sirkels uit. Bedek die pasteie met die deegsirkels, verf ’n bietjie melk oor en bak vir sowat 25 minute teen 180 °C tot goudbruin en deurwarm.