Wintersnoei
van hibried-teerose
Hibried-teerose het pragtige snyblomme, wat dit ’n groot gunsteling maak. Ná die afgelope seisoen se droogte en die onsekerheid in talle streke oor wat die lente gaan bring, is dit beter om liggies te snoei, anders kan die roos onder kwaai druk wees indien waterbeperkings op sekere plekke van krag bly.
Met ’n ligte snoei sal die roos vinnig nuwe blare maak, want die ogies is varser en jonger en loop makliker uit. Met meer blare word die wortels aangemoedig om dieper en breër te versprei op soek na nuwe bronne van water en voedingstowwe – dit alles gee die roos tydens ’n waterskaarste ’n groter kans op oorlewing.
As jy hard terugsnoei (die getal lote verminder en die hoogte inkort tot sowat 50 cm), snoei jy terug tot by die ouer, dormante ogies wat langer neem om uit te loop. Indien die roos nie genoeg water kry nie, neem dit nog langer om uit te loop, wat beteken die roos produseer minder blare op korter stele; die wortelstelsel is ook onderontwikkel en vaar nie goed wanneer dit net af en toe water kry nie. Só snoei jy onder gewone klimaatstoestande: • Snoei terug tot heuphoogte pleks van kniehoogte vir die meeste variëteite en behou van die sylote aan die hoofstele. • Verwyder dooie takke en ouer hoofstele (dis die grys stele en dorings). • Snoei een loot af waar ’n tak gevurk het. • Trek alle blare of, want dit kan plae en siektes huisves. Wanneer snoei jy? Van middel-Julie af en nie later as die eerste week van Augustus nie. In baie koue streke (die Oos-Vrystaat en die Kokstad-omgewing van suidelike KwaZulu-Natal) moet jy liefs wag tot einde Augustus. Nasorg Verwyder al die blare, want plae en siektes kan gedurende die winter daar intrek. Verryk en belug die grond deur byvoorbeeld kompos, grondboondoppe of fyngemaakte appelkoospitte 30 cm diep in te werk. Sprinkel agterna Vigorosa oor en maak goed nat.