Beesvleiskerrie
Genoeg vir 4 Bereidingstyd: 30 minute Gaarmaaktyd: 3 uur
• 15ml olie • 1kg beeskortrib- en -dikrib-blokke • 30ml tamarynpasta, gemeng met 125ml warm water • 400ml klappermelk • 3 lemmetjieblare • 125ml klapper, gerooster • 15ml ligbruinsuiker SPESERYPASTA • 15ml koljandersaad • 5ml komynsaad • 1 kaneelstokkie • 4 naeltjies • 5ml rissievlokkies (of na smaak) • 1 groot duim vars gemmer, geskil en baie fyn gekap • 3 knoffelhuisies, baie fyn gekap • 1 stingel sitroengras, geskil en gekneus • 1 klein ui, baie fyn gekap • 5ml varsgerasperde borrie
1 Maak die speserypasta Rooster die koljander, komyn, kaneelstokkie en naeltjies saam in ’n droë pan tot aromaties (dié stap is opsioneel, maar dit verbeter die geure). Keer dit uit in ’n vysel en stamp fyn. Meng met die res van die pastabestanddele en sowat 30 ml water tot ’n growwe pasta. 2 Braai die speserypasta in die olie tot geurig (1–2 minute). Voeg die vleis by en braai totdat dit oraloor met die speserypasta bedek is en begin bruin word. Voeg die res van die bestanddele by en draai die hitte af tot baie laag. Stowe stadig met die deksel op vir 2 uur. Haal die deksel af en laat prut vir nog sowat 45 minute. Roer af en toe om te keer dat dit aanbrand namate die sous konsentreer. Proe vir sout en peper en sit voor met geurige basmatirys, sambals en piesang.