’n Perfekte mengsel van oud en nuut in ’n 90 jaar oue Durbanse huis
Nadat Janelle Enslin haar eie huis opgeknap het, het sy ’n nuwe loopbaan ontdek waarin sy haar kreatiwiteit vrye teuels kan gee.
Die Enslins van Durban het altyd in huurhuise gewoon en geduldig gewag vir ’n huis wat hulle na hul smaak kon opknap en versier.
Uiteindelik het hulle dit gekry: ’n 90 jaar oue huis met ’n see-uitsig. Die ligging, interessante struktuur en ouwêreldse sjarme het die knoop deurgehak en hulle het die huis in Augustus 2015 gekoop. Maar die binnekant was nie naastenby die elegante, eklektiese ruimte wat dit vandag is nie.
“Die vorige eienaars het in die 45 jaar wat hulle op dié hoekerf gewoon het, feitlik geen opknapwerk gedoen nie,” sê Janelle. Die huis het strukturele veranderinge en ’n algehele dekor-vernuwing nodig gehad. Dit was die perfekte uitdaging vir Janelle en sy het haar uitstekend van haar taak gekwyt – in so ’n mate dat sy besluit het om ’n interieurontwerper te word en nou haar eie onderneming bedryf.
Voor sy kon wegspring met die dekor, het hulle mure uitgebreek om oopplanruimtes te skep, veral aan die voorkant van die huis, wat op die see uitkyk.
Die huis se mosterdgeel matte is opgetel en nuwe toebehore en ingeboude kaste is geïnstalleer.
Met die opknapwerk klaar, het elke vertrek en al die houtwerk ’n nuwe laag verf gekry. En toe kon Janelle die huis vul met besonderse dekor-items, onder meer van die Verenigde Koninkryk, waar hulle ses jaar lank gewoon het.
Hoewel sy geen formele binneversieropleiding het nie, het Janelle, wat voorheen ’n menslikehulpbronbestuurder was, nog altyd ’n oog vir dekor gehad. Tydens dié opknap kon sy haar kreatiwiteit uitleef, en vriende wat haar handewerk gesien het, het haar aangemoedig om dié passie voltyds uit te leef. Sy het Beloved Interiors in Maart 2016 op die been gebring.
“Ek het lank met my gesondheid gesukkel en dit sou bitter moeilik wees om terug te keer na die korporatiewe wêreld – dit het my help oortuig om my eie onderneming te begin,” vertel Janelle. “Eers het ek net strooikussings gemaak, maar my besigheid het kort voor lank ’n klein aanlynwinkel en konsultasiediens vir interieurontwerp ingesluit. Omdat my herstel met die voltooiing van die opknap saamgeval het, het ons die huis Hope Cottage gedoop.” >>
Meng en pas
Janelle se kreatiewe flair is in elke vertrek te sien; hier leef oud en nuut, asook helder en onderbeklemtoonde kleure in perfekte harmonie. “Dis vir my belangrik dat die ou en nuwe items goed saam lyk, en ek gebruik hartsgoed met sentimentele waarde regdeur die huis; ek sorg dat daar kosbare herinneringe of erfstukke van my ouma en ouers in elke vertrek is,” sê sy.
“Niks hoef perfek te pas nie, maar al die ruimtes moet tog met mekaar verbind deur ’n tema. Daar is byvoorbeeld blou en wit in elke vertrek omdat ek daarvan hou en ons naby die see woon; só voel dit altyd of ek met vakansie is.”
Maar Janelle volg nie enige ander dekorreëls nie. “Versier jou huis met dinge wat vir jou mooi of betekenisvol is,” is haar raad. “As iets vir jou vreugde bring, gebruik dit in jou woonplek. Dis hoe jy weet jy skep ’n ruimte wat jou persoonlikheid, leefstyl en lewensverhaal weerspieël.” >> Tekstuurryke afwerkings en ragfyn gordyne gee die gastekamer (regs) ’n ontspanne dog weelderige gevoel. Janelle het die kopstuk van laaghout en ’n ou sponsmatras gemaak en oorgetrek met eenvoudige gestreepte lap. Vir die kussingoortreksels op die bed het sy regte graansakke gebruik.