’n Grafiese fokusmuur perfek vir ’n tegno-slim tiener
Die Madsen-Leibold-gesin pak ’n verfprojek aan en skep ’n indrukwekkende ‘moederbord’ teen Gerard se kamermuur.
TToe Ansophí (18) vroeër vanjaar haar kamer in haar ouerhuis in Somerset-Wes ontruim om meganiese ingenieurswese aan die Universiteit Stellenbosch te gaan studeer, het haar boetie, Gerard (15), gespring om die kamer syne te maak.
Maar dit was nog in Ansophí se styl met ’n mooi fokusmuur van voëls in ’n boom – darem net te vroulik na Gerard, ’n gr. 10-leerder en groot aanhanger van elektronika en rekenaars, se smaak.
Toe die gesin besluit om vir hom ’n nuwe fokusmuur te verf, het Ansophí kom hand bysit. Die ontwerp? ’n Voorstelling van ’n rekenaar se moederbord.
Ná ’n bietjie navorsing aanlyn het Ansophí die skets in Photoshop gemaak, asook ’n 3D-ontwerp sodat almal kon sien hoe die muur gaan lyk.
Eers is die agtergrond donkergrys geverf – ’n skakering wat spesiaal vir die projek gemeng is.
Daarna het Gerard en sy pa, Hardy, ’n ingenieur, die skets vergroot en op die muur nagetrek. En toe het almal, ma Marietjie inkluis, die lyne ingekleur met wit en ’n spesiaal gemengde oranje verf en kwaste van verskillende groottes.
Vele hande was beslis in hul geval ligte werk – en Gerard is hoog in sy skik met sy nuwe kamer!
Die verwery was goed vir die gesin; ons het musiek geluister, gesing en ons tyd saam waardeer.
– Marietjie