Plante van die maand Winterblomme vir jou huis
Al is dit winter, is daar steeds blomme om te pluk vir jou huis. Hier is ’n paar staatmakers wat in die koue maande blom!
Jou tuin hoef nie vaal te wees in die winter nie,” gesels Hermien Coetzee van Flowers in the Foyer op Stellenbosch. “Daar is genoeg plante wat nou blom en jy vir jou huis kan pluk.
“Dink maar aan magnolias, kamelias, blomkwepers, die inheemse gemmerbos, ’n verskeidenheid proteas, Serrurias, aronskelke in die Kaapse winter en helderoranje vuurpyle.”
Maar dis nie al nie. “Voor jy begin snoei, pluk ook die bessies, sade en roosbottels wat nog sedert die herfs aan die takke sit. Dit lyk altyd mooi in ’n winterrangskikking.”
Gemmerbos of watersalie (Tetradenia riparia)
Dit is moeilik om die gemmerbos se veeragtige blomme mis te kyk. Dié inheemse struik blom gedurende die winter in pers, wit en soms ook pienk aan die bopunt van die plant se kaal takke. Blomtyd is van Junie tot Augustus, en as jy in ’n rypgebied bly, plant dit in ’n warmer deel van jou tuin of beskerm die struik teen ryp om te keer dat die blomme skade kry. (Die plant se natuurlike habitat is dele met min of geen ryp, soos KwaZulu-Natal en Mpumalanga.)
Gemmerbos groei vinnig en sal in die eerste jaar al blomme dra. Die blare is geurig en die plant word tradisioneel vir medisinale doeleindes gebruik. Plant dit in goed gedreineerde, komposryke grond in volson. In warmer dele sal dit ook in halfskaduwee aard. Dit het in die somer meer water as in die winter nodig – dus die ideale plant vir somerreënstreke. >>