Dekordilemma
DIE UITDAGING
Teresa Tiedje vra op Facebook Ons het ’n paar maande gelede by ons huis ingetrek en het hulp nodig met ons oopplan-sit-en-eetkamer. Dis ’n klein ruimte wat altyd deurmekaar lyk. En omdat dit die deurloop van die voordeur af is, kan ons nie ons meubels teen die muur skuif om ekstra ruimte te skep nie. Ons het nog nie meubels gekoop nie, so ons gebruik nog ou stoele en ’n stel patiomeubels. Ons wil die vertrek graag verf en hou van skakerings van bruin en die voorkoms van natuurlike klip. Enige raad?
DIE OPLOSSING
Die stilis en fotograaf Margaux Tait van mylifestyled.co.za het die
volgende raad Ons almal sukkel van tyd tot tyd met ’n ruimte wat nie werk nie. Die grootste fout wat mense maak, is om meubels in te bring wat te groot is vir die vertrek, of te veel meubels wat die vloei van die vertrek belemmer. Ek het ’n paar staatmaker-planne wat enige ruimte in ’n japtrap sal omtower ...
1 DIE PALET Kies warm, neutrale kleure soos Salisbury Stones 5 of Natural Hessian van Dulux. ’n Liggrys, soos Dusted Moss 3, sal ook wonderlik lyk hier. Verf al die mure vir eenvormigheid tussen die twee areas; dit sal die ruimte visueel bymekaarbring en dit ’n aanloklike, oop gevoel gee. As jy wil, kan jy ’n spatsel kleur (probeer kobaltblou) of ’n koper-element inbring; albei sal mooi pas by daardie verfkleure.
’n Ligte kleurpalet werk die beste as jy dit kombineer met teksture wat diepte en visuele trefkrag skep; hou dit in gedagte wanneer jy inkopies doen. Probeer hoëglansverf op sekere meubelstukke om lig deur die ruimte te kaats en die oog te tref.
2 MEUBELS Het jy geweet dat jou ruimte groter kan lyk juis deur jou meubels van die muur weg te skuif? Selfs net ’n paar sentimeter sal ’n verskil maak. Hou ook in gedagte dat hout kleur toevoeg. Wanneer jy te veel verskillende soorte saam gebruik, kan jou ruimte deurmekaar lyk. Verf eerder ’n paar items, of hou by hoogstens twee soorte hout; ek stel ligte houtsoorte voor omdat dié ruimte so knap is.
Oorweeg ’n kleiner L-vormige bank voor die kaggel en ottomans vir ekstra sitplek pleks van ’n verskeidenheid stoele en rusbanke. Jy kan ook bankies aan die eetkamertafel se lang sye gebruik met ’n stoel by elke kort sy; so kan jy die ruimte ten beste benut.
Groot, kleurvolle matte in albei areas sal die ruimte ophelder; dit moet groot genoeg wees om onder ’n meubelgroepering te pas sodat dit die area anker.
3 MUURKUNS Bly weg van ’n klomp klein kunswerke en kies liewer ’n paar groter werke vir diepte en elegansie. Stal dit bo ooghoogte uit om die illusie van hoogte te skep.
4 VEELDOELIGE ITEMS Gebruik minder meubels en kies veeldoelige ontwerpe wat meer as een funksie het. Oorweeg byvoorbeeld ’n koffietafel met ingeboude bêreplek vir tydskrifte, of ’n ottoman wat ook pakplek het vir strooikussings of dekens.
5 FOKUS! Tekstuurryke plakpapier in ’n soortgelyke kleur as die muur sal ’n interessante fokuspunt agter die eetkamertafel skep.
6 KYK OP! Gebruik interessante, hoë rakke en lang plante om die oog na bo te lei en die illusie van hoogte te skep. ’n Lang hanglamp wat uit die plafon hang, is ook ’n goeie idee. Skep dan laag-op-laagbeligting met staan- en tafellampe waarmee jy ’n sagte, romantiese atmosfeer kan bewerkstellig.
7 VENSTERS Los die vensters onbedek; die ruimte sal dadelik oper en ruimer voel sonder gordyne. As jy dink die vertrek gaan te warm raak of te veel son kry, oorweeg verdonkerblindings wat jy kan laat sak soos nodig. >>