’n Vakansiehuis-gevoel
Die voormalige eienaars, Evi en Jochem Elsner van Home Concept, het die ruim huis met sy hoë plafonne self ontwerp en ses jaar lank hier gewoon voor hulle Yzerfontein toe getrek het. Hulle is goed bevriend met die Wandel-susters en kom kuier gereeld – ’n ervaring wat Evi beskryf as “tegelyk bekend én vreemd”.
Die huis is ontwerp met gemak in gedagte, verduidelik sy. Dis seker hoekom mense dikwels sê dit voel meer soos ’n vakansiehuis. “Vir ons was dit net ’n gemaklike lekkerleef-huis met ’n ontspanne atmosfeer en genoeg plek vir al ons vriende – ons troeteldiere het dit net soveel geniet! Ek is bly dis nog steeds so ’n knus, lugtige ruimte met ’n pragtige uitsig.”
Die Wandel-susters, wat die huis in 2016 gekoop het, was dol oor die oop ruimtes wat terselfdertyd genoeg privaatheid bied. “Ons het ook ons hart verloor op die houtvoordeur en die houtraam rondom die venster in die leefarea. Elke detail is vir ons pragtig!”
Die huis front noord met ’n berguitsig aan die noorde en die see sigbaar op die horison. “Jy kan dit uit elke venster sien,” sê Andrea. “In die somer kan ons ure op die terras deurbring.”
Nog ’n gunsteling-kuierkol is die balkon op die tweede vlak. “Ons span heerlik uit op die groot rusbank en kuier ook graag met vriende hier.” Danksy die ligging van die balkon is dit beskut teen die somerwind. >>
Die ou hout van die tafel is regtig mooi. Wanneer ons ons hart op ‘n ou meubelstuk
verloor, moet ons ’n plekkie daarvoor kry! –Marion