Het jy geweet?
Jy kan ’n laag veiligheidsfilm (sowat R750/m², installering ingesluit) oor jou deure en vensters laat aanbring. Dis soortgelyk aan dié wat mense aan hul motorruite sit teen grypdiewe; dis net dikker en sterker en het UV-beskerming. Soek aanlyn na ’n versk
Deursigtige stawe
Polikarbonaatstawe (sowat R1 230 vir ’n venster van 950 x 950 mm, installering ingesluit) is gewild omdat dit deursigtig is, maar het ’n swak reputasie gekry omdat dit glo maklik is om die stawe te breek. Dis ideaal vir laerisiko-areas soos moeilik bereikbare vensters, of om diere soos apies uit te hou as jy op ’n landgoed woon.
[ONTHOU ...]
• Al kan die stawe heelwat druk weerstaan (’n baksteen of hamer sal dit nie sommer breek nie) en maak hul buigsaamheid dit moeilik om hulle met ’n koevoet van die raam los te ruk, sal dit nie noodwendig bestand wees teen herhaalde aanvalle nie – net soos met ander veiligheidsmaatreëls. • Video’s van stawe van ’n swakker gehalte wat met ’n blaasvlam gebrand word, is wyd op sosiale media versprei; dié soort is baie bros en word nie aanbeveel nie. Goeie polikarbonaatstawe kom soms met hul eie aluminiumraam pleks dat dit direk aan die vensterraam geheg word. As jy stawe raakloop wat nie so ’n raam het nie en aan jou venster se bestaande raam geheg moet word, vergelyk die prys met dié hierbo (dit moenie veel goedkoper wees nie) en maak seker die stawe is stewig. • Jy kan drade oor die stawe se lengte af laat installeer wat aan jou alarmstelsel gekoppel word.
Rolhortjies
Dié hortjies van staal of aluminium (sowat R16 500 vir ’n 1 000 x 2 200 mmopening, installering ingesluit) rol af en sluit wanneer nodig en rol op in ’n omhulsel wanneer dit nie in gebruik is nie. Die beweging word beheer via ’n muurgemonteerde paneel of afstandbeheerder.
[ONTHOU ...]
• Die omhulsel kan in ’n muur of plafonruimte versteek word – besluit voor installering of jy dié opsie verkies. • Daar is verskeie funksies beskikbaar vir die motor, soos supervinnige werking, oorskakeling na handbeheer of ’n batterygedrewe opsie in geval van ’n kragonderbreking, sonkrag-motors, asook sensors wat hindernisse registreer. • Rolhortjies is ideaal vir deure en vensters van huise wat vir lang tye leegstaan, soos vakansiehuise. • Dit werk ook goed binne-in die huis; jy kan dit gebruik om twee dele van mekaar te skei. Gebruik dit byvoorbeeld om die slaapkamers snags van die res van die huis af te skerm. Rolhortjies is minder onooglik as ’n gewone veiligheidshek in die middel van jou gang.
Sifskerms
Dié industriëlesterkte-sifskerms van vlekvrye staal (R33 636 vir ’n oopvouopsie aan ’n venster van 2 500 x 1 900 mm, installering ingesluit) kom in ’n aluminiumraam en elkeen is gemaak om oor ’n spesifieke opening te pas – van skuifraam- of gewone vensters tot skuifdeure. Dis duur, maar dis die naaste ding aan ’n veiligheidsversperring wat amper onsigbaar is. [ONTHOU ...] • Die skerms kan gesluit bly (met ’n sleutel) terwyl vensters en deure oopstaan. Dit lyk baie soos sifdeure wat insekte uithou, maar is heelwat sterker. • Party skerms hou UV-strale uit; vra by jou verskaffer. • As jou begroting nie daarvoor voorsiening maak om dit by al jou deure en vensters te laat installeer nie, kan jy dit oorweeg vir hoërisiko-areas of in dele van die huis waar jy ’n permanente oplossing soek wat nie jou uitsig sal belemmer nie.