Take vir Julie
Snoeiwenke
Somer- en herfsblommende struike moet nou gesnoei word, en rose eers laat in Julie (sien Ludwig se rooshoekie). Snoei struike terug in ’n mooi ronde vorm en verwyder enige dooie hout of lang, dun stele wat onnet lyk. In baie koue tuine moet jy liewer eers in Augustus snoei om rypskade by nuwe lote te vermy.
Moenie banksia- of erfenisrose nou snoei nie; jy gaan ontwikkelende blomknoppe verwyder. Dieselfde geld vir lenteblommende rankers en struike soos Chinese jasmyn (Jasminum polyanthum), sterjasmyn (Trachelospermum jasminoides) en verbleikblomme (Brunfelsia pauciflora).
Bladwisselende vrugtebome word volgens soort gesnoei, en jy moet weet op watter hout die vrugte gedra word; vra jou plaaslike tuinsentrum om hulp.
Beskerming en privaatheid
In die winter, wanneer kleure vervaag en die tuin meer gestroop lyk, bied immergroen plante ’n welkome kleurinspuiting.
In kouer wintertuine sal konifere langs die grens wind afkeer en plante beskerm. Konifere is immergroen, rypbestand en beskikbaar in verskillende vorms – kolomme, piramides of spreidend – met groen, goue of grys loof.
Heiningplante is nie net geskik vir privaatheid of omrandings, as windbeskerming en nesmaakplek vir voëls nie, dit kan ook binne-in ’n tuin gebruik word om een deel van ’n ander af te baken. Geskikte opsies is Abelia grandiflora, blousyselbos, Escallonia, immergroen viburnums, Rhaphiolepis en Kaapse kanferfoelie.