’n Tuin vir alle seisoene
Endebeni Forest is ’n fees vir die oog.
Die parkagtige tuin by Endebeni Forest is dwarsdeur die jaar ’n skouspel – sodra een vrolike spatsel kleur verdof, is daar ’n ander een wat sy plek inneem.
“Elke seisoen is ongelooflik mooi, met iets spesiaals wat blom,” sê die huiseienaar, Tessa Chance. “Die vorige eienaars, wat die tuin ontwikkel het, het gesorg dat daar in al vier seisoene ’n oorvloed van kleur is.”
Endebeni Forest is in die Lidgetton-vallei in die KwaZulu-Natalse Middelland; Tessa en haar man, Jamie, het die plaas in Desember 2016 gekoop met die plan om eendag daar af te tree. “Ons voel so geseën om deel van Endebeni Forest se geskiedenis te wees. Ek is dol oor tuinmaak en vind dit baie terapeuties. My ma en skoonma was albei ywerige tuiniers; dit het beslis ’n invloed op my gehad.”
Endebeni Forest voel kompleet soos ’n Engelse parktuin. Dit bestaan uit boslande met onder meer ’n inheemse geelhoutbos, ’n hele boord Japanse blomkersies, blomstruike by die dosyne en oop veld met ’n uitsig op ’n dam waarin waterlelies gedy. Die matige klimaat, met hoë reënval in die somer en mis wat sekere tye van die jaar die lug afkoel, is ideaal vir ’n seisoenale tuin soos dié – daar is heeljaar iets om na te kyk. >>
Ek het in ’n uitgestrekte plaastuin grootgeword. Dit was so mooi, en soveel pret! Ek is dol oor die groot, karaktervolle ou bome. – Tessa