Strooikussings Span dit só by jou dekor in
Van sagte blommotiewe tot helder geometriese patrone – werk kreatief met vorms, motiewe en groottes wanneer jy kussings kies.
’n Eklektiese keuse van kussings en tekstiele gee dié alledaagse rusbank hope persoonlikheid.
#1 Klassiek en modern sy aan sy
Kussings met ’n klassieke, botaniese patroon en een met breë strepe werk verrassend goed saam met ’n Afrika-deken en die moderne lap op die koffietafel in Jane Linley-Thomas van Durban se TV-kamer. Die koraalkleur wat in al die tekstiele herhaal word, skep samehorigheid – dis die geheim wat die mengsel van motiewe en patrone laat werk.
#2 Een motief, verskillende groottes
Wanneer jy blommotiewe in dieselfde sagte palet meng, hou dit interessant deur die grootte van die motief op die onderskeie kussings af te wissel. As die kussings boonop verskillende groottes en vorms het, is dit des te mooier, soos op dié stoep van Liesl Rheeder. >> Soortgelyke kussings is te kry by Plan B Vintage en Strand Trading Post; kanttafel van Chair Crazy
# 3 Herhaal ’n kleur
Geometriese patrone is treffend, en kussings is ’n slim manier om sulke vrolike patrone én ’n modieuse aksentkleur terselfdertyd by jou dekorskema in te werk. Die mentgroen geometriese patroon hier skep ’n treffende kontras met die donkergrys muur in Jane Linley-Thomas se slaapkamer. Dieselfde mentgroen en grys word in die kussing regs herhaal – ’n suksesvolle kombinasie.
#4 Motiewe van fyn tot groot
Strooikussings kan maklik voorspelbaar raak, maar nie as jy motiewe van verskillende groottes kombineer nie. Dink laag-op-laag, soos Lauren Frates van iSpy op Knysna graag doen. In haar hoofslaapkamer speel sy ’n grafiese blommotief en ’n fyn tradisionele patroon teen mekaar af vir ’n interessante effek.
#5 Intense kontras
’n Monochroom swart-en-wit dekorskema is tydloos en klassiek, maar met strooikussings kan jy dit lag-lag ’n vrolike, informele, modevars inspuiting gee. Hoe helderder die kleure, hoe meer intens en dramaties is die kontras met die neutrale skema.