Vra die kenners 82 Ougoed of hougoed 82 Vra vir JJ 84 Troeteldiere
Hoe kan jy ’n ou stoel opkikker, of watter skadubome moet jy plant? Vra net – ons kry die antwoorde.
Nuwe lewe vir ’n ou stoel
Ingrid Nuy van Kaapstad skryf Ek wil ’n stoel herstoffeer wat ek jare gelede gekry het toe ek in ’n studentehuis gebly het. My ma dink dis die lelikste stoel ooit; sy noem dit die “Toad of Toad Hall”. Ek dink weer dit vertel ’n storie en het karakter; dis lekker gemaklik, maar die lap is oud en verbleik. Ek wil dit graag oortrek in ’n natuurlike palet of met sagte groene en titsels blou, pienk en ander neutrale kleure, of iets met ’n neutrale agtergrond en spatsels pienk en grys. Die stoel is bestem vir die kantoorhoekie van ons slaapkamer; ek wil daarop sit terwyl ek op my skootrekenaar werk. Enige raad?
1 Antique Rose in Duck Egg R475/m
2 Herringbone Ticking in Grey R420/m
3 Rhapsody in Coral R495/m (al drie van biggiebestwebshop.co.za)
4 Botanical Protea in Mint R289/m
5 Indian Block in Sage Green R349/m
6 Spotted Leaf in Duck Egg R289/m (al drie van constantiafabrics.co.za)
Marian van Wyk, Tuis se kreatiewe redakteur, antwoord
Nuwe stoffering sal beslis dié padda in ’n prins omtower en ’n pragtige fokuspunt in jul slaapkamer skep. Ongelukkig kan dit net soveel (of selfs meer) as ’n nuwe stoel van ’n kettingwinkel kos. Maar die koste is nie die belangrikste oorweging nie. Ek is ’n groot aanhanger van ouer stukke opknap, ongeag hoe oud en afgeleef dit is. Dis hoekom: • Ouer meubels is dikwels baie stewig gebou. As jou stoel die afgelope 20 jaar oorleef het, het dit ’n sterk raam en sal dit waarskynlik nog 20 jaar oorleef. • Wanneer jy ’n nuwe leunstoel koop, is daar dikwels geen inligting oor die gehalte van die stoffeerstof nie. As jy self die lap kies, het jy al die besonderhede – tot hoeveel vryfslae (“rubs”) dit kan hanteer. Laasgenoemde is ’n bedryfstandaard waaraan die lap se gehalte gemeet word. Vervaardigers onderwerp die lap aan strawwe toetse, waar ’n skuurblokkie heen en weer oor die lap geskuur word totdat dit deurskaaf. Elke heen-en-weer-beweging staan bekend as ’n dubbele vryfslag.
• Jy weet reeds jou stoel is gemaklik – dis al genoeg rede om dit te hou! • Dis beter vir die omgewing om iets te hergebruik.
Wat lap betref, stel ek voor jy kies iets met ’n motief; dit verbloem vlekke beter as ’n soliede kleur.
As jy iets uit die natuur soek, sal ’n antieke roosmotief goed werk. Maar indien jy iets kontemporêrs met ’n plaaslike geur verkies, is fynbos nommerpas. Strepe is ook prettig en tydloos. Grys is ’n gewilde neutrale kleur en lyk wonderlik saam met sagte pienk en blou skakerings. Jy kan dit aanvul met ’n strooikussing of deken, of knope oorgetrek in ’n kontrasterende kleur.
As jy nou regtig ’n fokuspunt van jou stoel wil maak, trek elke deel daarvan (die basis, sitplek, armleunings en rugleuning) oor met ’n ander soort lap. Daarvoor is ’n samehangende kleurskema noodsaaklik; kies byvoorbeeld strepe, sagte blommotiewe of sterk patrone, maar hou by een kleurfamilie.
Stuur gerus vir ons ’n foto van die eindresultaat!
Pragtige tegniek
Annette Nel van Benoni skryf Daar is die pragtigste kas op bladsy 55 van jul Maart 2017-uitgawe. Het die huiseienaars dit so geverf en indien wel, watter tegniek het hulle gebruik? Die huiseienaar, Jako Lee, sê hy het die kas net so by Asmat Trading in Durbanville, Kaapstad, gekoop. Maar dis moontlik om dieselfde effek met meubelverf te kry. Annie Sloan stel voor jy verf jou kas met ’n basislaag Annie Sloan-verf in die kleur Original en wag sowat 20 minute sodat dit kan droog word. Wend dan ’n laag Annie Sloan Clear Soft Wax aan. Volg dit op met ’n dik laag Annie Sloan Dark Soft Wax. Gebruik dan weer die Clear Soft Wax om enige oortollige Dark Wax te verwyder tot jy tevrede is met die resultaat. KONTAK anniesloansa.co.za
Kies tolkrag
Carmen Langeveldt van Pretoria
skryf Ons huishouding raak al hoe meer omgewingsbewus. Omdat ons ’n groot gesin is, sal ek moeilik sonder ’n tuimeldroër oor die weg kom, maar ek sou iets ekovrien-delikers verkies – wat is my opsies?
Paul Dimaio, eienaar-stigter van Spindel, antwoord Die mees energie doeltreffende tuimeldroër is dié soort wat met ’n hittepomp werk. Hulle hersirkuleer die hitte wat gedurende die droogproses opgewek word en verminder sodoende die energieverbruik met tot 50%! Die meeste handelsmerke dui die energieverbruik van hul masjiene op die verpakking aan, wat dit makliker maak om hulle te vergelyk. Onthou net dat die energie doeltreffender droërs jou ’n aardige bedraggie uit die sak kan jaag!
As alternatief kan jy ’n toldroër soos die Spindel-wasgoeddroër oorweeg – dit werk met tolkrag pleks van hitte en gebruik daarom minder as 1% soveel energie as ’n tuimeldroër. En dis veilig, selfs vir die fynste materiale soos winter wol goedjies en onderklere.
Die masjien verwyder sowat 80% van die vogtigheid wat ná ’n masjienwas in die materiaal agterbly binne minute, wat beteken jou wasgoed sal in ’n kits winddroog word. En as jy nie ophangplek het nie, kan die Spindel jou tuimeldroër se werktyd met tot 70% inkort – so kan jy jou tuimdroër hou en steeds energie doeltreffender werk. Nog’ n voordeel van toldroërs is dat hulle kompak en draagbaar is, en maklik in ’n kas pas. ’n Spindel-toldroër vir ’n 4,5 kg-lading (54,6 cm hoog x 36,2 cm breed) kos sowat R2 000.
KONTAK 0860 555 135, spindel.co.za >>