’n Kothuis van yskaspanele met ’n asemrowende see-uitsig

Dié boumetode is vir my fantasties – jy kan die openinge vir die deure en vensters verander, al staan die mure al! – James James en Gail Tinsley se huis van yskaspanele is ’n skoner, groener gebou met uitstekende isolering!

Die kothuis is heerlik knus. Dis so goed geïsoleer dat ‘n mens maklik soos 'n kluisenaar hier kon leef, veral in die kouer maande! – Gail

James, wat Fish Hoek Refrigeration by sy pa oorgeneem het, het nog altyd daarvan gedroom om ’n kothuis van yskaspanele te bou – en daar was net mooi genoeg ruimte op hul erf vir ’n kompakte een slaapkamer plekkie.

Klink dit gek? Dink weer. Koelkamers is perfek geïsoleer met uitstekende termiese eienskappe regdeur die jaar. Dis ook wateren klankdig, en die boumetode is vinnig, skoon en kostedoeltreffend–dit kos sowat R 4000/ m 2.

Toe ons hom vra oor die nadele, het dit James ’n bietjie onkant gevang: “Goeie vraag. Ek sal ’n bietjie moet dink ...”

Omdat hy as’t ware in die yskas-bedryf grootgeword het en al talle koelkamers vir restaurante gebou het, het James nog altyd gedink dat die materiaal wat hulle daar gebruik, ook elders ingespan kan word. “Ek het dit so geniet om my vaardighede op ’n woonhuis toe te pas; dit was ’n heerlike uitdaging.”

In Januarie 2015 het hy begin bou aan die “yskas-kothuis”. Die planne is vooraf goedgekeur deur die strukturele ingenieur Paul Giloi, wat toesig gehou het oor die strukturele aspekte van die projek.

Hoewel die kothuis gouer klaar kon kom, het die proses drie maande geduur omdat James die meeste van die werk self in sy vrye tyd moes doen.

“Ons het enkelverdieping gebou omdat ons nie die see-uitsig van ons eie huis wou bederf nie,” verduidelik James. “Maar ek skat jy kan tot drie vlakke hoog veilig bou, solank jy met’ n struktuur ingenieur saamwerk.” >>

KOMBUISDie kompakte leefarea bestaan uit ’n kombuis met kaste van soliede dennehout, ’n eetarea en sitkamer.

Die meubels en dekor is meestal vintage-vondste wat Gail oor die jare bymekaargemaak het.

SLAAPKAMERDie slaapkamer en leefarea is een oopplanruimte en daar is selfs uit die bed ’n lieflike uitsig van die Indiese Oseaan. Dekens en kussings van Arabesque

BADKAMERDie stort is beklee met klippe wat op die eiendom opgetel is. Die koperpype is teen die muur gemonteer omdat James nie aan die pragtige klip wou kap nie. Die teëls op die stortvloer kom almal uit gestaakte reekse.

’n Ou houtkassie in ’n muurnis bied pakplek.