Plante van die maand Lenteblomme
Wanneer dié lieflike blomme hul gesiggies begin wys, kan jy maar weet: Die lente is hier!
G“Geen potjie of bakkie, koppie of blik hoef in die lente leeg te staan nie,” sê Melissa Rautenbach van die bloemistesaak Flourish. “Daar is nou soveel blomme om van te kies en jy kan regtig met min moeite jou huis ’n lentegevoel gee.
“Ons het ’n ou kassie wat in my motorhuis was, volgepak om dié indrukwekkende fokuspunt (oorkant ) te skep,” vertel sy.
“Blikkies, mooi ou teekoppies, melkbekers, bakkies, glaspotjies en emalje is gebruik as houers vir die verskeidenheid blomme. Die houers moet verkieslik nie perfek bymekaar pas nie; die verskillende groottes, kleure, vorms en teksture dra alles by tot die atmosfeer van jou lente-uitstalling. Dis ook glad nie nodig om ’n hele kas vol blomme te pak nie; jy kan net een of twee rakke vir blomme gebruik en dit kombineer met boeke, tydskrifte of familiefoto’s op die ander. Of sit blomme in glaspotjies op ’n tafel, ’n vensterbank of kaggelrak – dit is net so mooi en sal die lentegeure en -kleure in jou huis verwelkom.
“Maak die potjies vol skoon water en sny die blomstele in verskillende lengtes sodat almal nie ewe hoog is nie. Rangskik hulle dan net soos jou hart begeer – met sulke mooi lenteblomme is daar nie ’n reg of verkeerd nie! Selfs ’n blom waarvan die steeltjie afgebreek het, hoef nie gemors te word nie – laat dit in ’n bakkie water dryf,” sê sy.
“Voor jy gaan lenteblomme koop, kyk eers wat blom in jou tuin. Jy sal verbaas wees hoeveel daar gereed staan vir pluk. Maar as jy nie genoeg het nie, koop ’n paar bossies: affodille, freesias, pronkertjies, Hollandse irisse, ranonkels, Yslandse papawers en tulpe is net party van die groot verskeidenheid wat in die lente beskikbaar is. En jy het net ’n paar blomme van elk nodig; selfs ’n enkele blom in ’n potjie lyk pragtig. Al wat jy nie te koop gaan kry nie, is die kappertjies en vergeet-my-nietjies wat ons gebruik het. As hulle nie in jou tuin staan nie, saai beslis daarvan vir volgende lente – al twee is maklik om aan die groei te kry. Of bedel ’n blom of twee by ’n tuinvriend!” >>