Rabarber
Dié plant word as groente gekweek, maar danksy sy vele medisinale eienskappe en hoë voedingswaarde kan dit ook as ’n krui beskou word.
Kweek dit so Koop gevestigde plante by ’n kwekery en plant dit in die lente of herfs in vrugbare, komposryke grond wat goed dreineer. Spasieer plante 1,2 m uit mekaar in ’n sonkol. Maak gereeld nat en hou die grond klam met deklae; die plant het baie water nodig vir sappige stele. Verwyder blom- of saadstele sodra hulle verskyn.
Kruiewenk As jy stadig vrystellende organiese bemesting toedien net nadat jy jou rabarber geplant het (en in die eerste jaar daarna) sal dit keer dat aanraking met nitraat die plant beskadig (dit kan dodelik wees vir die plant).
Het jy geweet? Eet net die stele. Die blare bevat hoë vlakke van oksaalsuur, wat giftig in hoë dosisse kan wees.
Oes dit so Wag tot die plante twee tot drie jaar oud is voor jy die stele oes. Kies net die sterk, sappige stele; dié wat te dun is, is nog nie ryp genoeg nie. Knyp die steel aan die onderkant af, sny die blare af en gooi weg. Los minstens twee stele aan die plant sodat dit aanhou groei. Verdeel die wortels elke drie tot vier jaar wanneer die plant dormant is.
Gebruike Dit help met gewigsverlies (min kalorieë) en spysvertering (baie vesel), kan Alzheimersiekte vertraag (hoë konsentrasie vitamien K voorkom die oksidasie van breinselle en verhoog kognitiewe aktiwiteit), stimuleer beengroei (vitamien K), verbeter velgesondheid, kan glo help om kanker te voorkom (dit bevat betakarotien en ander anti-oksidante) en verbeter bloedsomloop (die koper en yster stimuleer die vervaardiging van rooibloedselle). Gebruik dit in gebak (koeke en poedings) en konfyt, of kook dit vir koue sop (voeg ’n versoeter by).
KONTAK healthyliving-herbs.co.za
Die eerste week van September is Nasionale Boomplantweek – plant gerus een van die Bome van die Jaar: • Blinkblaar-wag-’n-bietjie (Ziziphus
mucronata) is ’n middelslagboom (tot 10 m) met blink loof en dorings – dit maak ’n goeie veiligheidsheining. Sy groen-geel blommetjies lok bye en skoenlappers, en voëls smul graag aan die harde, blink vrugte. • Ebbehout (Euclea pseudebenus) is ’n grasieuse boom met dun, hangende takke en klein, klokvormige room of geel-groen blomme. Danksy ’n diep penwortelstelsel is die boom veral geskik vir warm, droë toestande.
Plant ’n boom Erfenismaand
Dis belangrik dat ons ons tuin- en plant-erfenis bewaar, veral plante soos die pelargonium. Baie mense verwar pelargoniums met malvas, die helderkleurige blomme wat ons dikwels in vensterbakke en hangmandjies sien en wat spatsels kleur verskaf in openbare en huistuine.
Moderne kultivars bied opwindende, helder kleurkombinasies en uiteenlopende blaarkleure en -vorms. Party word gekweek vir hul welriekende loof met die geur van appel, sitrus, peperment, sjokolade, neutmuskaat, roos of balsem.
Gebruik pelargoniums in potte om ’n trap af te rond of leë kolle in ’n beddingrand te vul; jy kan dit ook in ’n hoogstamplant vorm deur ’n hoofsteel te laat groei voordat jy van die ander stele afknyp; versier ’n paadjie met geurige pelargoniums langsaan.