Meellose grondboontjie-ensjokoladekoek
Maak 1 x 20cm-koek
• Bereidingstyd: 20 minute
• Baktyd: 35 minute Oondtemperatuur: 170 °C
• 150g donkersjokolade, gekap
• 100g botter by kamertemperatuur
• 80g gladde grondboontjiebotter
• 150g (180ml) ligbruinsuiker
• 3 ekstragroot eiers, geklits
• 75g (180ml) kakao
• 5ml vanieljegeursel
• ’n knippie sout
1 Voer ’n 20 cm-koekpannetjie met bakpapier uit en smeer goed met botter. Sif ’n lagie kakao oor; skud die oortollige kakao uit. Voorverhit dit oond.
2 Smelt die sjokolade versigtig en laat effens afkoel. Klits die botter, grondboontjiebotter en suiker saam tot baie lig en romerig. Voeg die eiers een vir een by en vou dan die gesmelte sjokolade, kakao en vanielje daarby in. Skep in die voorbereide pan en bak vir 35 minute of tot ’n toetspen skoon uitkom. Laat die koek vir sowat 10 minute in die pan afkoel voor jy dit versigtig uitkeer. Die koek is heerlik net so, dalk met ’n lepeltjie dikroom of ’n klein skeppie roomys – maar as jy dekadent wil wees, versier dit met grondboontjietruffels.
Grondboontjie truffels
Maak dié maklike truffels deur 250 ml grondboontjiebotter, 250 ml versiersuiker (gesif) en 3 ml vanieljegeursel saam te klits. Vorm happiegroot balletjies, vries vir 1 uur en doop dan in gesmelte donkersjokolade. Maklik en heerlik!