Kombuise Maak dit die spilpunt van jou huis!
Die kombuis bly maar die middelpunt van menige huishouding. Ons kyk na ses stylvolle werk- en kuierkombuise.
Die Ellis De Luxe-stofie kom van die familieplaas van Krisjan se lewensmaat, Douw Botha, op Lydenburg. “Toe sy pa, Jaap, oorlede is, het die stofie ’n stadsmeisie geword. Sy werk lieflik en hou ook die hele huis warm in die winter,” vertel Krisjan.
#1 KOMBUIS Kleur en fleur
Toe Krisjan Fourie sy Westdene-huis uit die veertigerjare opgeknap het, het hy een ding geweet: Ingeboude kaste en ’n teëlvloer sou nie deug in sy kombuis nie. “In my nuwe kombuis wou ek ’n eetkamertafel hê waarby ’n skare kan aansit, asook ’n klavier sodat ons kombuisteater kon hou!” vertel Krisjan, wat kookklasse by sy huis aanbied.
Vandag beslaan dié oopplan-vertrek ’n ruim 120 m² en spog dit met ’n kontemporêre wit epoksivloer en losstaande retro-meubels – Krisjan beskryf die styl as “retro-kitsch”.
Die vintage-elemente in dié vertrek, wat uitloop op die tuin, het hy self oor jare bymekaargemaak.
“Die meeste het ek by wyle Leonard Wichtman van die destydse Bruce Tait’s Kitsch Collectables in Kaapstad gekoop,” vertel hy.
Die geel-en-groen vintage-kas kom van ’n tweedehandswinkel op Rosendal in die Vrystaat. “Ek het in ’n ‘binge’ sewe kaste daar gekoop!” >>
Eilandparadys
Gaste drom gewoonlik saam rondom die kombuiseiland. “Dis aansienlik hoër as die gewone, want ek is ’n Langjan,” skerts Krisjan. “Ek wil nie ná ek gekook het voel asof ek wasgoed in die rivier gewas het nie!”
Die eiland dien ook as fotostasie wanneer hy kookklasse aanbied. “Ek pak al die bestanddele eers daarop uit vir ’n kiekie. En as die kookwerk klaar is, word die geregte ook hier afgeneem. Verder is die eiland ’n kuierplek tussen die werkery deur. Dit staan op wiele sodat ons dit maklik kan rondskuif agter die lekkerste sonkol aan.”
’n Vriend, Nic Fenske van Wood-nWotnots, het die eiland, asook die eettafel gemaak van die huis se oorspronklike Oregondennehout-dakkappe. “Dis ’n manier van herwin wat die gees van die ou huis laat voortleef,” sê Krisjan.
Wat is sy raad vir ander wat ’n soortgelyke kombuis wil skep? “Dis ’n groeiproses waarin jy baie van jouself gaan leer. Kleur gerus bietjie in oor die lyne, en laat daai wilde streep in jou los!” >>
Die kleure en skakerings van die sonstrale wat deur die glasware voor die vensters op die wit vloer val, is ’n kunswerk op sy eie. – Krisjan
Slim plan
Die was-en-opwaskamer is ’n smal vertrek wat agter dié muur versteek is. Hier kruip die skottelgoedwasser, wasbakke, oop rakke vir breekware en ’n yskas weg.
#2 KOMBUIS Kleur en fleur
Pam en Mark Lee van Rondebosch het groot planne vir hul opknapprojek gehad: Die bestaande kombuis moes plek maak vir ’n TV-kamer en wynkelder, waarna ’n nuwe 40m²-kombuis en ’n opwaskamer aangebou moes word. Maar geen projek kom natuurlik sonder sy uitdagings nie – vir hulle was dit om die nuwe kombuis te laat lyk asof dit nog altyd deel van hul 100 jaar oue huis was.
“’n Moderne kombuis was beslis buite die kwessie,” vertel Pam. Daarom het sy en Mark by sloopwerwe en aanlyn begin rondsoek na herwinde boumateriaal: breë Oregondennehout-vloerplanke, outentieke terracottateëls, asook Oregon-plafonbalke – perfek vir die voorkoms wat hulle wou hê.
“Dit was nogal harde werk om die regte lengtes, breedtes en hoeveelhede te kry,” vertel Mark, “maar op die ou einde het ons genoeg van alles gehad.”
Die Lees het Holly Wood Kitchens opdrag gegee om daardie tipiese Provensaalse of plaasvoorkoms met die kombuiskaste te skep. Die kleurskema is swart, rooi en room – ’n kombinasie waarvan hulle baie hou.
“Die swart kas en rooi eiland staan uit, terwyl die res van die kaste met die mure saamsmelt,” vertel Pam.
Die spilpunt van dié kombuis is die eiland van 2,4 x 1,2m. “Omdat die gasstoof in die eiland ingebou is, is dit waar ons al die voorbereiding doen, kook én eet. Ons geniet ook ontbyt of drink koffie of wyn saam met vriende hier.” >>