Tuindagboek Woeker op jou werf
Die kombuistuin
Wêreldkosdag is op 16 Oktober, wat beteken dis die perfekte tyd om ’n kombuistuin te oorweeg. Deur jou eie groente en slaaigewasse te kweek, het jy die gemoedsrus dat dit nie met chemikalieë behandel is nie, die groente proe lekkerder en dis sagter indien dit vinnig groei – werk dus oorgenoeg kompos by die grond in om sterk, gesonde groei aan te moedig en te keer dat die grond te veel water verloor.
Die meeste groente moet gereeld natgemaak word. Waar daar waterbeperkings van krag is, kan jy water in die grond behou deur enige ontblote grond tussen die groente te bedek met ’n dik deklaag van growwe kompos, basstukkies of strooi.
Voed plante met ’n vloeibare bemesting soos Nitrosol, of met Margaret Roberts Supercharger, ’n organiese misstof wat plante se weerstand teen siektes help opbou en sterk, gesonde groei aanmoedig.
Wat om nou te plant
Beet, boerkool, broccoli, eiervrug, komkommers, mielies, murgpampoentjies, pampoen, radyse, rissies, seldery, skorsies soetrissies, spinasie, spinasiebeet, sprietuite, stam- en rankboontjies, wortels.
Rankboontjies, murgpampoentjies, tamaties en skorsies het ondersteuning nodig in die vorm van ’n heining, latwerk of houtstruktuur. Tamaties Plant saailinge diep in die grond met die boonste vier blare bo die oppervlak; dit moedig ’n sterk wortelstelsel aan. Ondersteun nuwe groei met ’n draadkeël. Hou die grond koel en vogtig en keer onkruidgroei met behulp van ’n deklaag. Maak die wortel-area goed en gereeld nat, maar hou water van die blare af. Kropslaai Kies hittebestande variëteite met oop blare. Maak gereeld nat – dit het vlak wortels en verlep gou in warm weer. In warm tuine moet dit smiddae liefs gefiltreerde skadu kry. Kruie Plant basilie, komkommerkruid, grasuie, koljander, sitroengras, Franse dragon, pietersielie, roosmaryn, salie en tiemie. Kweek dit in potte naby die kombuisdeur vir maklik pluk. Maak die plante gereeld nat tot dit goed gevestig is, snoei om nuwe, bosagtige groei aan te moedig en verwyder basilie-blomme sodra hulle verskyn.