Kortpadkos Aandete in ’n japtrap
Kleurvol, maklik – en smaaklik verby.
Aartappel-en-maalvleisgebak Onder R105 • Genoeg vir 4 • Bereidingstyd: 15 minute Gaarmaaktyd: 30 minute • Oondtemperatuur: 200°C
• 750g bevrore aartappelwiggies • 15ml olyfolie • 1 ui, gekap • 350g maalvleis
• 1 rooi soetrissie, gekap • 15ml tamatiepasta • 2 wiele feta, gekrummel • srirachasous en vars basilie
1 Voorverhit die oond. Versprei die aartappelwiggies in ’n gesmeerde oondbak, geur met sout en peper en bak vir 20 minute.
2 Verhit intussen die olie en braai die ui tot glansend. Voeg die maalvleis by en braai tot goudbruin (breek die vleis deurgaans met ’n spaan op tot korrelrig). Voeg die soetrissie, sout en peper na smaak by, gevolg deur die tamatiepasta en ’n skeutjie water. Laat prut vir 15 minute.
3 Draai die gaar aartappelwiggies ’n slag om en skep dan die maalvleis bo-op, gevolg deur die kaas. Bak vir nog 10 minute. Sit voor met die sriracha en basilie.
Smeerkors-pizza Onder R130 • Genoeg vir 4 • Bereidingstyd: 10 minute Gaarmaaktyd: 30 minute • Oondtemperatuur: 180°C
•45 ml songedroogde tamatie-p est o • 2 blikke (120g) tuna, gedreineer • 100g olywe, ontpit • 200g kersietamaties, gehalveer • 200g mozzarella, in skyfies gesny • ’n hand vol vars roket
KORS • 250 ml bruismeel • 125 ml melk • 2 eiers • 60 ml olie • knippie gemengde kruie
1 Voorverhit die oond. Klits die korsbestanddele saam tot glad en giet dit in ’n bakplaat wat met bakpapier uitgevoer is (die beslag is redelik loperig).
2 Stip nou halwe teelepels pesto oor die hele kors, strooi die tuna, olywe en kersietamaties oor en rangskik die mozzarellaskywe bo-op. Bak vir sowat 30 minute of tot goudbruin en gaar.
3 Strooi die roket bo-oor, besprinkel met olyfolie en lê weg. Wenk Speel maar met die bolaag – die enigste kernbestanddeel is die kaas!