Kontemporêre baadjie
Toe Johan en Amori van Jaarsveld hul geskiedkundige huis uit die 1800’s op Graaff-Reinet begin opknap, moes die nuwe aanbouings modern wees. “Ons wou die gemakliker, meer praktiese en moderne industriële leefstyl in die nuut aangeboude vleuel hê, maar die nostalgie behou deur middel van ou afwerkings en meubels wat by die ou deel se boustyl pas,” vertel Amori. “Ons wou ons brood aan albei kante gebotter hê!”
As eienaar van The Windmill Junction, ’n oudhedewinkel op die dorp, is Amori se eerste liefde ou meubels en versamelgoed. Die kombuis van sowat 30 m², wat in die nuwe vleuel geleë is, spog dus met geelhoutbalke en skuifraamvensters uit die oorspronklike kombuis. Dit was ook vir Amori belangrik dat die kombuiskaste nie aan ’n sekere tydperk of styl gekoppel moet wees nie, maar eerder tydloos, met skoon lyne wat die ouer afwerkings komplementeer.
Dit was vir haar belangrik dat die meubels – meestal uit haar winkel – by die huis moes pas. Die kombinasie van oud en nuut hou ’n spesiale soort “chemistry” vir haar in. Jam Design van Plettenbergbaai het die kaste volgens die Van Jaarsvelds se voorskrifte gebou deur die verskillende teksture van hout, beton en graniet sorgvuldig te kombineer.
’n Vereiste was baie kuierplek vir die gesin en hul kinders, Nieke (5) en Jua (2), en hul vriende. Daar moes ook genoeg pakplek en kragpunte wees, en ’n ordentlike koffiemasjien.
“Die groot eiland is beslis die middelpunt van ons kombuis,” vertel Amori. “Ek wou doelbewus nie enige wasbakke of gasplate daarop aanbring nie, sodat ons dit meer kon benut vir eet en kuier as vir kosbereiding. Dit is baie gesellig om die kuiergaste of familielede om die eiland te hê terwyl hier kosgemaak word.”
Sedert ek ’n donkergrys kombuis op Pinterest gesien het, kon ek dit nie uit my gedagtes kry nie. – Amori