Tuisgebakte happies

Letitia Mason van Johannesburg skryf Ek bederf my honde graag met koekies, en verkies tuisgemaaktes bo dié in die winkel. Is daar ’n eenvoudige resep wat nie preserveermiddels bevat nie?

Ilze Fourie van Rogue’s Pawsome Bakery

antwoord Ek bederf graag my Staffordshirebulterriërs, Rogue en Drago, met koekies en ander happies. Maar Drago het onlangs ’n allergiese reaksie op sekere kosse ontwikkel – hy het begin jeuk en was nie ’n gelukkige brak nie.

Tydens opleiding word Drago beloon met kouhappies as deel van die proses van positiewe versterking en nadat sy allergieë sy opleiding begin beïnvloed het, het ek ander resepte begin beproef.

Dit was ’n uitdaging om ’n kombinasie te kry wat smaaklik en veilig is om te eet. Ná ’n paar probeerslae het ek besluit op ’n kombinasie van klapperolie en grondboontjiebotter. Klapperolie is goed vir jou troeteldiere se vel en pels, en die bietjie wat ek byvoeg, bring verligting vir Drago se gejeuk.

Die resep hieronder is Drago en Rogue se gunsteling-kombinasie – jy kan dit in die yskas of vrieskas bêre.

Bestanddele

• 500 g volkoringmeel • 100 g hawermout • 2 eiers • ½ koppie growwe grondboontjiebotter (maak seker dit bevat nie xilitol nie – dis giftig vir diere) • 2 eetlepels klapperolie (ongegeur)

Metode

1 Meng die meel, hawermout, eiers en grondboontjiebotter. 2 Los die klapperolie in warm water op. 3 Roer dit by die meelmengsel in. 4 Roer koue water by tot dit ’n stywe deeg vorm.

5 Rol die deeg uit en sny vorms van jou keuse uit.

6 Bak in ’n voorverhitte oond teen 180 °C vir sowat 25 minute of tot bros. KONTAK roguespawsomebakery.co.za