Leserhuis Oopplan en aards met ’n titsel industriële styl
Ná baie jare se beplanning aan haar droomhuis het Kowie Pretorius ’n ruimte geskep waar sy en haar gesin kan tuis voel.
Kowie Pretorius het nog altyd geweet hoe haar droomhuis moet lyk – tot op die fynste detail. Toe sy en haar man, Nico, in 2011 besluit om huis te bou, was sy slaggereed, gewapen met meer as 2 000 inspirasie-foto’s.
“Ek wou ’n bietjie van als hê!” onthou sy. “Ons huis moes aards wees met ’n oop plan, ietwat van ’n industriële styl en ’n kombinasie van moderne en meer klassieke elemente.”
Op die ou end kon Kowie, ’n prokureur wat nou tuisblyma is, al haar gunstelingstyle inwerk by dié huis met sy ses slaapkamers en vier badkamers op die Brigadoon-gholflandgoed net buite Rustenburg, aan die voet van die Magaliesberg. Die oop ruimtes laat natuurlike lig van alle kante af instroom en bied ’n lieflike uitsig op die indrukwekkende gholfbaan, die uitgestrekte veld en majesteuese berge wat dit omring; uit dié omgewing het Kowie inspirasie geput vir haar aardse palet met skakerings van bruin en grys. Spatsels groen, blou en geel voltooi die prentjie.
Buiten ’n praktiese ontwerp wat gemaklike vloei tussen die onderskeie dele verseker, was die paartjie se hoofdoel om ’n knus gesinshuis te skep met al hul hartsgoed – hetsy geërf, gerestoureer of herwin.
“Ons kon ons visie hier laat realiseer,” sê Kowie met ’n glimlag. “En ons voel bevoorreg om ’n huis te hê waar ons kinders kan fietsry, boomklim en buite speel, net soos ons in ons kinderdae gedoen het.”
[ ] KOMBUIS
Die kontemporêre kombuis is Kowie se trots. “Ek het duisende inspirasie-foto’s vir die res van die huis gehad, maar net een vir my kombuis!” sê sy.
Die kombuis het drie dele:
• ’n Eiland van 3,4 x 1,3 m staan sentraal in die oopplanvertrek, wat beteken al die kombuisgereedskap is byderhand en die gesin kan maklik maaltye saam geniet. • ’n Spens agter die kombuis huisves ’n kruidenierskas en elektriese toestelle. “Toestelle moenie uitgestal word nie,” sê Kowie. “Dié vertrek is ook die kinders se ‘kombuis’ waar hulle iets kan maak om te eet of kan bak en brou. As hulle nie behoorlik opruim nie, is die bewyse ten minste nie daar vir die wêreld om te sien nie,” sê Kowie en lag. • Die skottelgoedwasser en wasbak is weggesteek in die opwaskamer agter die spens. “Omdat daar altyd skottelgoed aan die ophoop is, is dié ‘wegsteekplek’ ’n seën!” sê sy.
[ ] INGANG
Dié dubbel volume ruimte i sin die middel van die huis. “Al is die huis nogal groot, kan ons mekaar uit alle uithoeke hoor,” sê Kowie. Die dubbeldeure bo lei na Kowie se studeerkamer.
[ ] BRAAISTOEP
Nadat die mure gepleister en droog was, het Kowie so baie van die rou voorkoms gehou dat sy besluit het om nie te verf nie. Dié ruimte maak oop op die dek en swembad. Die gietyster-muurrakkie is jare gelede by ’n kwekery gekoop.
[GASTEKAMER]
Kowie wou dié vertrek so neutraal moontlik hou; vir tekstuur is die mure behandel met ’n gespikkelde bedekking.
Mure bedek in SatinCrete van Cemcrete in die kleur Mercury Grey; gordynlap van Hertex
[HOOFSLAAPKAMER]
In hul kamer het die paartjie gemik vir ’n eenvoudige dog elegante voorkoms met ’n kombinasie van ou en nuwe meubels. >>
Wat dekor betref, is DeNicke Kowie uitgeknip. “Sy kyk graag na dekorfoto’s op Pinterest,” sê Kowie. Trouens, die 11-jarige DeNicke sê sy was geïnspireer deur ’n eilandfoto toe sy haar ma gehelp het om die kamer in te rig. “Die blou verteenwoordig die see, die goue plakkers die son, en die pienk, oranje en geel die pragtige sonsondergange en koeldrank op die strand,” verduidelik sy.