Coq Au Vin

in ’n dik tamatiesous Genoeg vir 6 mense

BESTANDDELE Vir die coq au vin

• 30ml olyfolie • 200g wildevark-spek, gekap of in repe gesny • 10 baba-salotte • 1 rooi ui • 6 hoenderdye-en-boudjies • 6 hoenderborsies • 45ml sjerrie • 4 knoffelhuisies, grofgekap • 600ml witwyn • 15ml tamatiepasta • 200ml hoenderaftreksel • 6 lourierblare • 2 takkies tiemie • 2 takkies roosmaryn • 200g broccoli • 200g oestersampioene • 3 sprietuie, gekap Vir die kapokaartappel • 6 aartappels, geskil en in blokkies gesny • 100ml room • 15ml truffelpasta • sout en peper Vir die verdikker • 30ml gewone meel • 15ml olyfolie • 5ml botter

METODE

1 Verhit die olie in ’n groot swaarboomkastrol en braai die spek tot lekker bros. Haal die gaar spek uit die pan en braai die salotte en ui tot goudbruin. Haal uit en hou dit eenkant saam met die spek. 2 Bestuif die hoenderdye-en-boudjies met meel wat met sout en peper gegeur is en braai dit dan vir sowat 6–7 minute in die olie tot goudbruin; draai gereeld om. Haal uit die pan en hou eenkant. Verlaag die hitte effens en kook die sjerrie en knoffel in dieselfde pan tot die meeste van die alkohol verdamp het. 3 Sit die hoenderporsies terug in die pan. Giet die wyn versigtig daarby terwyl jy deurentyd roer. Roer dan die tamatiepasta en aftreksel by en laat prut. Voeg die lourierblare, tiemie en roosmaryn by. Skep die gebraaide spek, salotte en ui terug in die pan, voeg die hoenderborsies by en sit die deksel op. Verlaag die hitte en laat prut liggies vir 1 uur. 4 Verhit intussen ’n pot water en geur dit met sout. Hou ook koue water en ys gereed in ’n aparte bak. Wag tot die water kook en blansjeer die broccoli vir sowat 40 sekondes. Sit dit dan dadelik in die yswater om die kookproses te stop en die kleur te behou. 5 Maak die kapokaartappel Plaas die aartappels in ’n pot kokende water ek kook tot sag. Skep die aartappels uit, druk dit fyn en voer deur ’n dromsif. Keer die aartappel uit in ’n pan met die room en meng goed tot glad. Voeg die truffelpasta by en geur. Hou eenkant tot jy gereed is om voor te sit. 6 Geur die broccoli en sampioene met sout, peper en olyfolie en braai dit dan liggies bruin onder die roosterelement of in ’n pan. 7 Haal die hoenderporsies uit die kookvloeistof sodra dit gaar is en pak dit op ’n dienbord. 8 Verdik die sous Meng al die bestanddele vir die verdikker in ’n klein bak. Bring die kookvloeistof tot kookpunt en voeg die verdikker stadig by; klits deurentyd tot die mengsel verdik. 9 Haal die hoenderborsies uit en trek dit uitmekaar met ’n vurk. Voeg van die kookvloeistof, asook die sprietuie by die gerafelde hoendervleis en hou dit warm tot jy gereed is om voor te sit.