Botterskorsieen-koeskoesslaai
met tahinisous
Tahini is ’n pasta gemaak van gemaalde sesamsaad. Dit het ’n ryk, neuterige geur en word dikwels in MiddeOosterse kookkuns gebruik. Genoeg vir 4–6 porsies Bereidingstyd: 20 minute Gaarmaaktyd: 30–40 minute Oondtemperatuur: 200 °C
• 1kg botterskorsie, in blokkies gesny • 1 knoffelhuisie, gekneus • 15ml komynsaad • 5ml fyn koljander • 5ml kaneel • 2,5ml fyn gemmer • 30ml olyfolie • 375ml groenteaftreksel • 400ml koeskoes • 30g geroosterde dennepitte • 1 rooi ui, fyngekap • 250ml gekapte vars koljanderblare
Tahinisous
• 1 knoffelhuisie, gekneus • 45ml vars suurlemoensap • 45ml tahini • 30ml water • 30ml olyfolie
1 Voorverhit die oond. Meng die botterskorsieblokkies, knoffel, speserye en olyfolie. Geur met sout en peper en meng goed deur. Sprei dit dan op ’n bakplaat uit en oondrooster vir sowat 30 minute tot gaar.
2 Verhit die aftreksel in ’n kastrol tot kookpunt. Verwyder die kastrol van die plaat en voeg die koeskoes by. Sit die deksel op en laat vir 5 minute staan; roer die koeskoes dan los met ’n vurk.
3 Berei die tahinisous Meng die knoffel, suurlemoensap en tahini. Voeg die water en olyfolie by om dit te verdun, en geur na smaak.
4 Meng die botterskorsie, dennepitte, rooi ui, koljander en koeskoes en drup die tahinisous oor. Roer versigtig deur en sit voor.
Let wel
Tahini is by die meeste supermarkte te kry.