Hoender-tagine met dadels
Die inspirasie vir dié hoender met sy speserygeure, soet droëvrugte en heuning kom uit Marokko. Die geheime bestanddeel? Bitter koffie.
Genoeg vir 4 ruim porsies Bereidingstyd: 25 minute, plus marineertyd Gaarmaaktyd: 1 uur en 20 minute Oondtemperatuur: 180 °C
• 8 hoenderstukke (boudjies en dytjies)
• 10ml fyn komyn
• 10ml fyn koljander
• 2cm vars gemmer, geskil en gerasper
• 2cm vars borrie, geskil en gerasper (of 5ml droë borrie)
• 1 kaneelstokkie
• 1 steranys
• 5ml gerookte paprika
• 2ml neutmuskaat
• 2 rooi brandrissies, gekap
• ’n reep lemoenskil
• 250ml goeie filterkoffie
• 15ml olyfolie
• 2 groot uie
• 3 knoffelhuisies
• 125ml dadels, ontpit en gekap
• 30ml heuning
• 100g geblansjeerde amandels, gerooster en grofgekap
• ’n bossie vars koljander
• koeskoes vir voorsit
1 Sit die hoender en al die geurmiddels – die speserye, brandrissie en lemoenskil – in ’n glas- of plastiekhouer en vryf die hoender goed daarmee in. Giet die koffie oor en laat marineer oornag.
2 Voorverhit die oond. Haal die hoender uit die marinade en druk droog. Braai in die olie in ’n oondvaste pan met ’n deksel tot geurig en mooi goudbruin alkante. Roer die uie, knoffel, dadels, heuning en amandels
by. Kap die koljanderstingels fyn (hou die blare vir garnering) en roer by saam met die behoue marinade. Geur met sout en peper, bedek en bak in die oond vir 1 uur.
3 Sit voor met koeskoes en ’n strooisel vars koljander.