Cappuccino-tertjies

Genoeg vir 4 x 15cm-tertjies Bereidingstyd: 45 minute Gaarmaaktyd: 30 minute Oondtemperatuur: 180°C

• 400g donkersjokolade-semelbeskuitjies, gekrummel

• sowat 140g botter, gesmelt

• 15ml botter

• 250g donkersjokolade, gekap

• 250ml room

• 10ml kitskoffie

• 2 ekstragroot eiers

• knippie sout

• 1 blik (360g) karamel

• 250g (1 houertjie) mascarpone

• 125ml room

• sowat 30ml strooisuiker (of na smaak)

• 15ml rum (of vanieljegeursel of koffie)

• kakao om oor te sif

1 Voorverhit die oond. Meng die koekiekrummels en die gesmelte botter en voer vier diep 15 cm-losboomtertpannetjies daarmee uit om die korse te vorm. Sit in die yskas tot nodig.

2 Smelt die 15 ml botter, sjokolade, room en koffie saam terwyl jy roer om dit te meng. Laat effens afkoel en klits die eiers en sout by tot glad. Skep nou ’n ruim lepel karamel onderin elke tertdoppie en maak glad. Plaas die pannetjies op ’n bakplaat, verdeel die sjokoladevulsel tussen die tertjies en bak vir 25–30 minute tot net gestol. Haal uit die oond en laat op ’n draadrakkie afkoel.

Let wel Die middel van die tertjies is geneig om op te pof in die oond en dan terug te sak namate dit afkoel.

3 Klits die mascarpone, room en suiker saam met ’n knertsie rum en skep bo-op die tertjies. Sif liggies kakao oor en smul!