Misogroente met avokado

Die kombinasie van miso, heuning en sitrus is vir my onweerstaanbaar. Sit dié interessante bykos voor met geroosterde hoender of as vegetariese hoofgereg met platbrood. Genoeg vir 4 Bereidingstyd: 10 minute Gaarmaaktyd: 45 minute Oondtemperatuur: 200 °C

• 10 babawortels, geskil en gehalveer

• 10 babarape, geskil en gehalveer

• 1 knolseldery, geskil en in wiggies gesny

• 2 blikke kekerertjies, gedreineer en gespoel

• 2 ryp avokado’s

• suurlemoensap

• mikrokoljander SOUS

• 30ml ligte miso

• 30ml olyfolie

• 5ml sesamolie

• 15ml heuning

• 1 rooi brandrissie, gekap

• gerasperde skil van 1 suurlemoen

1 Voorverhit die oond. Klits die sousbestanddele saam en meng dit deur die groente en kekerertjies in ’n oondbak. Rooster in die oond vir ongeveer 45 minute of tot gaar en gekaramelliseer. Roer die groente af en toe, en as dit lyk of die sous te dik word, voeg ’n skeutjie water by.

Halveer en ontpit intussen die avokado’s en besprinkel met suurlemoensap om te keer dat dit bruin raak. Maak balletjies met ’n spanspekskepper of sny in happiegroot blokkies. Geur met sout en peper.

Laat die gaar groente effens afkoel en sit voor met die avokado en koljander.

Ons hoort bymekaar soos avokado en letterlik enigiets! – Anoniem