Die antieke koper-kombuisgereedskap komplementeer die blou teëls perfek. – Monica van der Berg (die Fouries se dogter)
Nadat ’n vorige opknapprojek lelik skeefgeloop het, was Herman en Tiene Fourie genoop om ’n nuwe plan te maak by hul vakansiehuis op Sandbaai. Die kaste het letterlik uitmekaargeval en was doodgewoon krom en skeef!
Dié huis is een van die oudstes op die kusdorpie en reeds sedert 1976 in die Fouries se besit. Dit het voorheen aan sendelinge behoort en spog met sy oorspronklike skuifraamvensters en hortjies in die dik, ou mure. Volgens Monica van der Berg, die Fouries se dogter en mede-eienaar van die vinielplakkeronderneming Hope Vol Hoop, was dit vir haar ouers belangrik om die oorspronklike gevoel van die streek te behou.
“Een van die kenmerke van die distrik is blou en wit melamienvloerteëls,” vertel Monica, wat die nuwe kombuis vir hulle ontwerp het. “Tydens die opknapprojek het ons dus by die blou-en-wit kleurskema gebly om die gevoel te versterk.”
Om als mooi netjies af te rond, het Monica vir die mure vinielteëls in dieselfde kleure laat druk om by dié tema te pas.
[V&A] met Monica
Wat is jul grootste geldspaarwenk? Om die bestaande uitleg van die kombuis te gebruik en klaar gemaakte kaste te koop.
Waar het jy jou idees gekry? Ons inspirasie was die oorspronklike blou en wit vloerteëls en die blou see daar buite. Ons wou graag hê die kombuis moet die huis se persoonlikheid weerspieël. Wat geniet jy die meeste van die voltooide projek? Die vertrek het lieflike vloei en daar is ’n heerlike warm atmosfeer. Almal wil net hier om die kombuistafel kuier! Wat is volgende? Ons wil graag ’n kuierput buite onder die melkhoutbome maak. >>
[DIE AFWERKING EN KONTAKTE]
Kaste Innovative Timber (084 209 2552) Lampe en muurhake MRP Home (0800 212 535, mrphome.com) Vinielplakkers Hope Vol Hoop (076 732 0785)