Soutkarameltert
Ons maak ’n kortpadkors met brosbroodkoekies wat amper smaak soos regte brosdeeg, maar sonder die moeite. Genoeg vir een 12 x 34cm-tert Bereidingstyd: 30 minute, plus stoltyd
• 200g brosbroodkoekies, gekrummel
• 70g botter, gesmelt VULSEL
• 80g gladde grondboontjiebotter
• 100g melksjokolade, gesmelt
• 125ml room
• 200g donkersjokolade, gerasper
• 1 blik karamel
• 5ml rum
• ’n knippie soutvlokkies BOLAAG Grondboontjiekraaklekkers en/ of piesangskyfies, mentblaartjies, sjokoladeballetjies en geklopte room
1 Meng die koekiekrummels en botter en voer ’n langwerpige losboom-tertpan daarmee uit sodat dit ’n dun kors vorm. Bak vir 5 minute in ’n voorverhitte oond teen 180 °C om ’n bros resultaat te verseker; laat dit dan effens afkoel.
2 Meng die grondboontjiebotter en melksjokolade en smeer dit oor die bereide kors. Verhit die room in ’n klein kastrol tot dit net kook en giet dit oor die gerasperde sjokolade. Roer tot al die sjokolade gesmelt het en die mengsel glad is. Klits nou saam met die karamel, rum en sout tot gemeng en skep bo-op die grondboontjielaag. Laat staan tot gestol.
3 Versier nou na hartelus met skerwe grondboontjiekraaklekker, lepels vol dik room, piesangskyfies, mentblaartjies en sjokoladeballetjies. Ons het met ’n klein koekiedrukker blommetjies uit die piesangskyfies gedruk. Onthou om die piesang met suurlemoensap te bedruip sodat dit nie verkleur nie. Smul dadelik voordat die room smelt!
Om te smul, veral aan soetgoed, is lynreg in stryd met die reël dat ’n mens eet om te oorleef. Dit gaan oor kos as ’n uitdrukking van oorvloed, oordaad en uitbundige weelde. – Nigella Lawson, Feast