Kos is op die tafel
Vier maklike, geurige aandetes.
Gnocchi met engelvis en ertjiepesto
Onder R125 • Genoeg vir 4 • Bereidingstyd: 25 minute Gaarmaaktyd: 15 minute
• 300ml bevrore ertjies, ontvries
• ’n hand vol vars basilie of 30ml basiliepesto
• 250g mediumvet-roomkaas
• sap en gerasperde skil van
1 suurlemoen (of na smaak)
• sowat 500g gnocchi
• 15ml elk olie en botter
• 4 porsies engelvisfilet, drooggedruk
1 Giet kookwater oor die ertjies en laat dit stoom vir 5 minute of tot net sag. Dreineer en meng met die kruie, roomkaas en suurlemoensap en -skil. Pols met ’n staafmenger tot ’n growwe pesto en geur na smaak met sout en peper.
2 Kook die gnocchi in soutwater totdat die happies dryf (volg die aanwysings op die pakkie), skep met ’n gaatjieslepel uit die water en meng warm met die ertjiepesto.
3 Terwyl die gnocchi kook, verhit die olie en botter saam tot gesmelt en braai die vis tot net gaar – engelvisfilette is gewoonlik maar dun, so hou fyn dop dat dit nie oorgaar braai nie. Sit die vis en gnocchi saam voor met ekstra suurlemoenwiggies en, as jy wil, ’n strooisel mikrokruie vir tekstuur.
Hoenderlewer-en-chorizo-slaai
Onder R130 • Genoeg vir 4 ruim porsies Bereidingstyd: 10 minute • Gaarmaaktyd: 10 minute
• 15ml olyfolie
• 200g dun chorizo- of salamiskyfies
• sowat 350g hoenderlewertjies, skoongemaak en in blokkies gesny
• 200g kersietamaties
• 45ml balsemiekasyn
• 125 g bros blaarslaai, goed afgespoel
• ’n hand vol wortel- of botterskorsielinte
• 1 ryp avokado, in blokkies gesny
• 1 klein rooi ui, gesny
• groot knoffel-croutons vir voorsit
1 Verhit die olie en braai die chorizo tot bros. Skep uit en behou die geurige olie. Braai nou die hoenderlewertjies daarin oor hoë hitte tot goudbruin aan die buitekant en nog net-net pienk binne. Geur met sout en peper, skep uit by die chorizo en verhit die tamaties en asyn saam in dieselfde pan.
2 Rangskik die blare, wortel, avokado, ui, chorizo en hoenderlewertjies in ’n mooi bak en sprinkel die tamaties en asynsousie bo-oor. Sit dadelik voor met die croutons en ekstra asyn na smaak. Wenk
Pleks van croutons kan jy die slaai in sagte broodrolletjies voorsit – dis ook meer vullend.