Koffiekolwyntjies met grondboontjiebotterversiersel

Vervang die koffie gerus met warm water en ’n lepeltjie vanieljegeursel as die kleinspan saameet.

Genoeg vir 12 • Bereidingstyd: 30 minute, plus afkoeltyd Baktyd: 20 minute • Oondtemperatuur: 180°C

• 30ml kakao

• 125ml koffie, warm

• 150g botter by kamertemperatuur

• 160g (190ml) strooisuiker • 3 eiers

• 140g (250ml) bruismeel

VERSIERSEL

• 125 ml sagte botter

• 125 ml onversoete grondboontjiebotter

• 5 ml vanieljegeursel

• 250 ml versiersuiker, gesif, plus nog 125 ml vir ingeval • 12 skerwe grondboontjiepralien (resep onder)

1 Voorverhit die oond. Klits die kakao en koffie saam tot glad; hou eenkant. Klits die botter en suiker saam tot lig van kleur en romerig, voeg die eiers een vir een by en klits ná elke byvoeging tot goed gemeng. Klits dan die meel en die kakaomengsel by tot net glad.

2 Voer die holtes van ’n muffinpan uit met papierrokkies, spuit met kleefwerende kossproei en verdeel die beslag tussen die rokkies. Bak die kolwyntjies sowat 20 minute of tot gaar en uitgerys. Laat afkoel op ’n draadrakkie.

3 Maak die versiersel Klits die botter, grondboontjiebotter, vanielje en versiersuiker saam tot goed gemeng. Oordeel of nog ’n bietjie versiersuiker nodig is vir tekstuur. Skep die versiersel in ’n spuitsak met ’n sterpunt en versier die kolwyntjies mildelik. Rond elkeen af met ’n skyfie grondboontjie-pralien.

Wenk Vir ’n rojale verrassing, maak ’n klein holte in elke koekie voor jy dit versier en vul dit met ’n Lindor-balletjie of skeppie sjokolademousse. Grondboontjie-pralien

Genoeg vir 1 plaat • Bereidingstyd: 20 minute Gaarmaaktyd: 10 minute

• 180ml suiker • 125ml kookwater

• 250ml geroosterde sout grondboontjies, grofgekap • 1 plak (80g) witsjokolade, gesmelt

1 Los die suiker op in die water in ’n klein kastrol oor matige hitte. Bring tot kookpunt sodra al die suiker opgelos is en kook sonder om te roer totdat die karamel ’n mooi goue kleur het. Verwyder van die hitte.

2 Plaas ’n vel bakpapier op ’n bakplaat en sprei die neute in ’n enkellaag daarop uit. Giet die warm karamel oor die neute en beweeg die bakpapier sodat die karamel ’n dun lagie vorm. Pasop vir brand! Laat die pralien staan sodat dit kan afkoel en hard word.

3 Drup die gesmelte sjokolade oor die pralien se oppervlak. Breek die pralien in skerwe sodra die sjokolade gestol is. Die kraaklekkers is ’n lekker bederf net so, of gebruik dit om die kolwyntjies mee te versier of as strooisel oor sjokoladeroomys.