Sê jou sê en wen ’n prys
Skryf aan ons by Tuis/Ons lesers sê, Posbus 1802, Kaapstad 8000 of stuur e-pos na redakteur@tuis.co.za.
Gesels saam by tuis.co.za of facebook.com/tuistydskrif, of volg ons op Instagram by @TuisHomeMag. Verstrek asseblief jou naam en van, asook die naam van jou dorp, wanneer jy aan ons skryf.
WENBRIEF
Tuis vir groot én klein Linsey-Lee Nel van Montagu skryf
Ons het inspirasie gekry om een kombuismuur met die pragtige Duram King Mackerel te verf, en toe ek vir klein Anke (wat nou die hele wêreld vol begin kruip) soek, kry ek haar in die badkamer besig om self inspirasie te soek ... Haar kamer is seker volgende!
Bring die sonskyn in
Bruce Mattheus van Rawsonville skryf
Nou met die isolasie kry ’n mens mos kans om dit te lees wat jy vroeër sommer so ge“scan” het. Ek kon nie help om te lag vir
Olivia Botha (in Tuis van November 2019) nie. Sy sê: “Ek is oortuig daarvan dat almal minstens een geel muur in hul huis moet hê om ’n vrolike blyplek te skep!”
Ek stem heelhartig saam – by ons nie net ’n geel muur nie, maar ook ’n geel voordeur. Dit sê: “Hallo!” en laat dit voel of die son inskyn.
My terapie
Ilza Joubert van Brackenfell skryf Ek is nie juis ’n opgaarder nie, maar van een ding sal ek nooit ontslae raak nie, en dit is my
Tuise. Hier is 61, die oudste een van Oktober 2009, toe Anneke nog redakteur was. Dis die enigste tydskrif wat ek nog koop, my bederfie elke maand. Ek sonder myself eintlik af om dit deur te blaai, te geniet en te droom. My man is net so gek daaroor, en dit het al gebeur dat ons per ongeluk elkeen met dieselfde uitgawe by die huis aankom.
’n Kinderslim plan
Carmi van Heerden van Centurion skryf
Terwyl ons nog twee klein kinders in die huis het, weier ek om enige nuwe meubels te koop, want kinders bly kinders. Nadat ek na vele video’s gekyk en tydskrifte deurgelees het, besluit ek om die kans te waag en ’n selfdoener te word. Toe koop ek ’n blik krytverf, was, leerpolitoer en lap, en spring weg!
Nou het ek ’n splinternuwe rusbank, vir net R500. Ek is so trots op myself.
So, vir dié wat wik en weeg: Doen dit net!
KORTLIKS
Hierdie stoel was wel afgeleef, maar dit het soveel potensiaal gehad. Ek het dit geverf met Tjhoko
Paint se Matt Black en ’n stensilpatroon (afgelaai van Pinterest) met Cloud White bygevoeg. Wys jou net: In elke afgeleefde meubelstuk lê daar die potensiaal om ’n pragstuk te word.
– Martie Blignaut, Windhoek
Tuis inspireer ons almal. Alouise en haar mamma het die Kersboom gemaak. Vir Francois het Oupa ’n slaaphoekie in sy studeerkamer ingerig. Ouma, wat dol is oor die tuinstories, het weer die stoel se potensiaal raakgesien.
– Alta Vosloo, Dwarswegstrand
Die skrywer van dié maand se wenbrief kry ’n Spindelwasgoeddroër van R2699!
Om voor te bly met die wasgoed – veral in die kouer maande – is ’n gedugte taak. Ontmoet die Spindel: dis kompak, draagbaar en gereed om jou wasgoed droog te kry én jou tyd, geld en elektrisiteit te bespaar. Die Spindel (beskikbaar by huiswarewinkels en takealot.com) gebruik tolkrag pleks van hitte, en haal binne drie minute tot 80% van die vog en seepreste uit jou klere. Boonop is dit veilig vir delikate items en winterwolgoed. Besoek spindel.co.za en SpindelSA op
Facebook vir meer.