Ougoed of hougoed?
Gail Rigele van Midrand skryf Ek het dié erdebeker, wat my ouma ná die Tweede Wêreldoorlog van Egipte af gebring het, geërf. Kan julle my enigiets daaroor vertel, en hoeveel dit werd is?
Ainsley Taylor van Stephan Welz & Co. antwoord Dié lieflike beker is ’n voorbeeld van Gouda-pottebakkersware wat, soos die naam aandui, uit die Nederlandse munisipaliteit Gouda kom. Die gebied is nie net bekend vir sy kaasprodukte nie, dit was ook eeue lank ’n groot produksiesentrum van keramiekware. Gouda-pottebakkersware is ’n generiese term vir alle Nederlandse pottebakkersware (buiten die bekender Delftware) en het ’n besonderse sjarme. ’n Firma genaamd Plateelbakkerij Zuid-Holland, of PZH, het die pioniers van pottebakkersware in dié styl geword nadat ’n nuwe proses omstreeks 1910 ontwikkel is om aan Goudapottebakkersware hul kenmerkende matglasuur-karakter te gee.
Die ware is tussen 1910 en die uitbreek van die oorlog in 1939 vir suiwer funksionele doeleindes gemaak. Miljoene stukke is vervaardig en oor die hele wêreld uitgevoer; hoewel dit nou merkwaardig klink, is elke stuk met die hand geverf en dra dit die voorletters van die kunstenaar. Duisende kunstenaars is gebruik om die verfwerk te doen en hulle het ’n mate van vryheid in hul keuse van styl en kleure gehad.
In die jare dat dié fabrieke floreer het, het die Art Nouveau- en Art
Deco-styl die wêreld van kuns en ontwerp in ’n groot mate beïnvloed, en albei style het hul weg op ’n unieke manier ook na Gouda-ware gevind. Dit dra by tot hul sjarme en deurlopende aantrekkingskrag vir versamelaars.
OUDERDOM Tussen 1910 en 1939
WAARDE Dié beker met sy ongewoon beperkte palet behoort R1 000–R1 200 op ’n veiling te haal.
KONTAK swelzco.co.za