Dié maand in jou tuin
Maak ’n nuwe paadjie in jou tuin of gaan die oues na vir ongelyk oppervlakke en herstel dit nou. Francois Oberholster en verskaf
REËNPAADJIES]
Die Duitse woord Hügelkultur beteken bult- of heuwelkultuur, en verwys na die kweek van plante op ’n mensgemaakte bult of heuweltjie.
Op ’n plat stuk grond sal Hügelkultur-bulte hoër en laer vlakke skep. Die hoër dele word gemaak deur ou stompe in ’n hoop neer te lê en dit dan met blare, grond en kompos te bedek tot ongeveer ’n meter hoog.
Sulke heuweltjies word só gerangskik dat daar ’n paadjie of trog (’n vlak kanaal met effens skuins rande) tussenin vorm, wat reënwater van harde oppervlakke sal lei sodat dit stadig in die grond wegsyfer en nie wegloop nie.
Die trôe word dan ook ’n habitat vir allerlei plante. Kweek plante soos Bulbine frutescens, Euphorbia tirucalli, Cotyledon orbiculata, Senecio mandraliscae en Aristida junciformis op die heuwels. Oorweeg wit varkore, wildeknoffel, matjiesgoed, Hostas en Astilbes vir die laer dele en Portulacaria afra ‘Nana’, Osteospermum en Arctotis teen die skuinstes.
In jou groentetuin is stamboontjies, soetrissies en uie perfek vir die heuwels; skorsies en kappertjies sal gedy teen skuinstes, terwyl pietersielie en blaarslaai geskik is vir lae areas.