Waterslim

Die meelplakkie kry sy volksnaam van sy loof, wat lyk asof dit met meel bestrooi is – ’n wit lagie wat help om sonlig te weerkaats en die plant koel hou. Dié meerjarige vetplant vorm ’n basis-roset van groot, geronde grysgroen blare met rooi rande. Klein buisvormige wit blommetjies met ’n soet geur ontwikkel aan ’n lang steel en voordat die moederplant sterf, vorm daar plantjies onderom (sien foto) wat uitgeplant kan word. Kweek dit in volson in rotstuine of teen skuinstes vir die beste blaarkleur.

Wat om nou te saai

Somerreënstreek Saai nou groenertjies in koeler dele, asook blaarslaai, witwortel, radys, spinasiebeet, tamaties (binnenshuis) en raap in gebiede wat minder ryp kry. “Bogrondse” gewasse soos kool, pampoen, blaargroente, tamaties, eiervrug, rissies en soetrissies kan jy nou binnenshuis in plantbakke saai.

Winterreënstreek Saai dieselfde vrugtedraende groente as in die somerreënstreek binnenshuis, asook beet, seldery, groenertjies en radyse; saai rape in situ (waar dit as volwasse plante gaan groei). Laeveld en KwaZulu-Natalse kus

Dis nou die beste tyd om beet, boontjies, eiervrug, rissies, wortels, komkommer, mielies, spanspek, skorsies, pampoen, radyse, spinasiebeet en tamaties te saai.