Opknap Trek weg of maak reg!
Dié knap, afgeleefde woonstel is ná ’n astrante aanbod as ’n belegging gekoop, maar vandag is dit ’n stylvolle ruimte waar die eienaars self nes geskop het.
“Deursigtige” stoele, ’n rusbank op pote en veeldoelige of modulêre meubels soos nestafeltjies of ’n sytafeltjie wat oor die rusbank se armleuning skuif, is goeie opsies.
Bring hoogte in met ’n hoë staanlamp, plante, en deure wat tot teen die plafon strek.
Meer lig is beter Kies afwerkings wat die natuurlike lig weerkaats, soos vloere in ’n ligte kleur of glasdeure as verdelers. Met verdofskakelaars – selfs in die badkamer en onder toonbanke – kan jy altyd die gewenste luim skep, of jy nou gaste vir skemerkelkies oornooi of jou in ’n kunsvlytprojek verdiep. Moet net nooit atmosfeer- en taakbeligting meng nie!
Maak pakplek Slim oplossings is noodsaaklik, veral vir die vyf “gruwels” van ’n klein woonstel: die mop, stofsuier, strykplank, vullisblik en groot reistasse.
Een in, een uit Wanneer jy ’n nuwe paar skoene koop, moet jy ’n ou paar aan jou naaste skuiling skenk. Daar is nie plek vir Imelda Marcos-versamelings nie! Dieselfde geld huis- en kombuisware.
Kleur As jy donker kleure slim inspan, kan dit die illusie van ’n groter ruimte en ’n weelderige atmosfeer skep, maar die geheim is om die palet af te wissel met treffende aksente, ligte tone, wit rande en kontras. Kragpunte Bestee ’n bietjie ekstra en installeer ’n groep elektriese en USB-punte aan weerskante van die bank. Daar behoort minstens een so ’n kragpunt in elke hoek van ’n vertrek wees. Só vermy jy lelike, ongerieflike verlengkabels.
Wees dapper Vat ’n paar kanse! Binneontwerp moet pret wees en jou persoonlikheid weerspieël – jy kan altyd weer die voorkoms verander. Dit gaan jou nie bankrot maak as jy iets oor vyf of 10 jaar moet oorverf of herstoffeer nie. Kies wel die beste gehalte vir permanente afwerkings.