Langs ’n meer en ’n MELKHOUTWOUD
Wanneer die Slabberts by hul kliphuis in die Overberg uitspan, is dit midde-in die ongerepte natuur en onafhanklik van munisipale netwerke.
Op Wortelgat, tussen die see en die Kleinrivier-strandmeer, is ’n wegbreekhuis wat spesiaal geskep is vir die lekkerte van luilekker kuiers. Dis waarheen die Stellenbossers Joritha en Roelou Slabbert gereeld ontsnap wanneer hulle wil wegkom van die stadsgewoel.
Hul huis is besonders – nie net omdat dit heeltemal “off the grid” is nie, maar ook ontwerp is om saam te smelt met die omliggende natuurskoon.
“Ons kuier somer en winter hier,” sê
Joritha van hul aardse huis van waar jy jou kan verkyk aan die krulstamme van melkhoutbome en die dynserige blou van die berge in die verte.
“Dis my hartsplek, waar ek op die stoep sit en lees en die hele gesin ure lank om die tafel kuier,” vertel sy verder. “Die wonderlikste van die huis is die gesinstyd wat ons hier deurbring. Ons seuns, Daniel, Janneman en Martin, speel saam kaart of bordspeletjies. Ons gaan draf ook of ry fiets. Hier is nie eens ’n televisiestel nie.”
Wortelgat, ’n eksklusiewe ontwikkeling naby Stanford, word bestuur deur die Wortelgat Outreach Trust en beskik ook oor konferensiegeriewe. Daar is sowat 25 privaat eiendomme wat almal tot teen die strandmeer strek. “Omdat dit ’n bewaringsgebied is, is dit ’n besonderse, ongerepte hoekie van die Overberg,” sê Joritha. “Ons sien soms ’n rooikat of ’n bosbok hier en hoor gereeld visarende roep.”
Roelou en Joritha Slabbert met hul seuns Daniel (19), Janneman (17) en Martin (11) Stanford
Huis 120 m², erf 2 489 m²